Nike mund Adidas, më shumë trofe në 10 sezonet e fundit

Cila është marka që ka fituar më shumë trofe në futbollin europian?
Këtë e zbulon një kërkim i VoucherCode, një faqe e specializuar në blerjet online. Sipas të dhënave, në dhjetë sezonet e fundit, Nike (ekipet në të cilat ai është sponsor teknik), është fitues i kompeticioneve kryesore futbollistike në Europë, në 51,4 për qind të rasteve.

Në vend të dytë është Adidas, fitues në 28,5 për qind të rasteve. Megjithatë, sa i përket Champions League, rezultati është i njëjtë me Nike (nga pesë trofe secila). Sezonin e kaluar bën përjashtim vetëm Leicester City me sponsor teknik Puma – fituese e Premier League.

Ky studim merr në analizë 5 kampionatet më të rëndësishme në Europë (Premier League, Primera Division, Bundesliga, Serie A, Ligue 1) si dhe dy kompeticionet europiane: Champions League dhe Europa League. Dominimi i Nike vazhdoi edhe verën e shkuar me dy trofe – Euro 2016 dhe Kupa e Amerikës me fitues respektivë Portugalinë dhe Kilin.

Dy gjigantët e sipërpërmendur ndiqen nga Umbro dhe Puma me nga katër trofe për kokë. Por ndërsa Umbro nuk fiton asnjë trofe që prej vitit 2012, kur Manchester City i Mancini-t fitoi Premier League, sezonin e kaluar New Balance doli për herë të parë fitues, pasi Sevilja fitoi Europa League për sezonin e tretë radhazi.

Në të vërtetë përpara New Balance, Sevilja kishte sponsor Warrior, e cila është pjesë e kompanisë amerikane që prej vitit 2004 (po ashtu edhe sponsor i Liverpulit) dhe duke filluar nga sezoni 2015-2016 u zëvendësua nga marka NB.

Po Sevilja ka ngjitur në podin e fituesve europianë një tjetër markë, por më pak të njohur, spanjolle Joma, që ishte sponsor i klubit gjatë sezonit 2006-2007 kur andaluzianët fituan për herë të dytë Europa League. Pra Sevilja triumfoi 4 herë në Europë me tre sponsorë teknikë të ndryshëm.

Një ndër sponsorët që shumë shpejt mund t’i shtohet listës është Under Armour, kompania amerikane që sipas zërave të ditëve të fundit është pranë nënshkrimit të një super kontrate me Realin e Madridit.

Së fundi, Europa League është kompeticioni që ka pasur një gamë më të gjerë fituesish, ndërsa Bundesliga – shtëpia e Adidasit – jo rastësisht është kampionati ku Nike ka rezultatet më të dobëta, me vetëm një fitues në dhjetë sezonet e fundit. Gjithashtu dy kampionatet e fituara nga Borussia Dortmund përbëjnë dy trofetë e vetëm për markën italiane të veshjeve sportive Kappa.