Kryesore
Dita e Gruas: Portrete nënash shqiptare – të zakonshme e të pazakonta!
Ato janë punëtore e fjalëpaka, oksigjeni i familjes shqiptare por nuk mburren. Lajtmotivi i jetës së këtij brezi nënash shqiptare: Sakrifikimi për fëmijët!
Kujtimi më i bukur? Të gjitha japin gati të njëjtën përgjigje!
Nga Deutsche Welle
Nënë Gjystina
Nënë Gjystina nga Shkodra, 65 vjeçe, 40 vite punë si ekonomiste, ka rritur e edukuar në shkollë të lartë katër fëmijë. Gruaja shqiptare ka vuajtur shumë për të rritur fëmijët, sot në demokraci nënat e kanë më të lehtë, thotë ajo. Kujtimi më i bukur i jetës? Lindja e djalit pas tre vajzash, asokohe nuk dallohej gjinia që në bark si sot, kujton Gjystina.
Nënë Bukurija
Nënë Bukurija nga Burreli, 67 vjeçe, ka rritur 10 fëmijë. Ngritjen në tre të natës për korrjen e grurit në kooperativë, ajo e kujton si vështirësinë më të madhe në vitet e rinisë. Sot jeton nga kopshti i saj. “I kam të miat, sallatën, domatet, qepën“. Gëzimi më i madh për të, lindja e djalit të parë. Frika se mbeteshim pa djalë ishte shumë e madhe për ne femrat, kujton ajo.
Nënë Tusha
Nënë Tusha nga Burreli, 82 vjeçe, ankohet se sot nuk ka më dashuri. Atëherë vërtet ne nuk kishim bukë, por e ndanim edhe atë çikë me njëri-tjetrin. Ajo kohë më pëlqente më shumë, thotë ajo. Gëzimi më i madh ishte kur linda çunin, gëzimi i dytë më i madh, kur lindi çuni i çunit.
Nënë Hurmaja
Nënë Hurmaja 73 vjeçe, pensioniste nga Tirana ka rritur 6 fëmijë, sot rrit nipërit e mbesat. Megjithëse njërën këmbë e tërheq zvarrë, ajo ngrihet të gatuajë gjellën, të pastrojë shtëpinë. “Askush nuk na detyron, por femrat e kohës sonë, sikur e kanë në gjak të shërbejnë“, thotë ajo. Gëzimi më i madh, lindja e djalit, kujton ajo.
Flutura nga Tirana
Flutura, 47 vjeçe, edukatore, rrit katër fëmijë në Tiranë. “Gjëja më e vështirë për t’u duruar qenka papunësia, gjithë jetën kam punuar, tani nuk firmos askund, të duket vetja parazit“, ankohet ajo. Gëzimi më i madh, kujton Flutura, ishte kur më pranoi babi në shtëpi, pasi u martova pa dasëm.
Nënë Mara
Nënë Mara nga Laçi, 69 vjeçe me 3 fëmijë. “Gjithë jetën punova në ndërtim, lodhesha shumë, punë jashtë, punë në shtëpi”, rrëfen ajo. Tani kanë ardhur kohë të bukura, veç të kemi jetë të jetojmë, shpreson nënë Mara. Për të rritur sadopak pensionin ajo shet përditë fara luledielli në një nga rrugicat e Laçit.
Nënë Fahrija
Nënë Fahrija, 65 vjeçe nga Tirana, dikur faturiste, sot në pension.
Ka rritur 8 fëmijë, një grua e fortë që thotë se ankimi të lidh duart. Sot “laj, gatuaj, dua të rris nipërit e mbesat”, thotë ajo. Gëzimi më i madh për mua ka kohë, ishte lindja e djalit pas 7 vajzash, tani lumturohem të shoh si rriten nga pak mjalti i mjaltit, fëmijët e fëmijëve, thotë ajo.
Vazhdo leximin
Duhet të jeni i kyçur në mënyrë që të mund të lini një koment Kyçu