Portalet po flasin sot për një takim të fshehtë të dyshes Rama-Meta, ndërsa analistët si afër Partisë Socialiste ashtu edhe afër Lëvizjes Socialiste për Integrim po thonë se koalicioni ‘se ka të gjatë’.

I pari që e tha këtë ishte botuesi i mediave “Mapo” dhe analisti Henri Çili dje në “Zonë e Lirë” me Arian Çanin. Çili madje dha një datë, ai tha se koalicioni qeverisës do të zgjasë deri në 15 prill.

“Unë e kam argument jo parashikim. Ky koalicion zgjat maksimumi dhe një muaj. Rama dhe Meta nuk do të hyjnë bashkë në zgjedhjet e 18 Qershorit. Pra, do të garojnë në vete, nuk do të ketë një koalicion parazgjedhor”.

Pas tij menjëherë kanë vërshuar edhe analistët e tjerë…

Në një shkrim me titull “PS-LSI, aleanca e pamundur” analisti Arion Sulo në gazeten Mapo, shkruan se “pingpongu i akuzave PS-LSI filloi dje më në fund të heqë vellon e misterit që mbulonte të ardhmen e koalicionit, dy krahët e të cilit kanë muaj që sforcohen me deklarata politikisht korrekte, por të pabesueshme për opinionin publik”.

“Shkëputja e fijeve të llogarive të koalicionit dhe ndarja më 1 prill nuk do të shërbente vetëm për të parë peshën e vërtetë të secilës prej tyre në elektorat, por edhe për të pasur një marrëveshjeje më luajale nesër. Ajo do të sqaronte dhe zgjidhte së pari, krizën që po troket fort duke nisur nga çadra e opozitës. Pak rëndësi ka me apo pa qeveri teknike. Në të kundërt, gjurmët e konfliktit mes PS-LSI do të mbarteshin në një katërvjeçar më të ashpër dhe të papërgjegjshëm se ky i tanishmi i qeverisjes me ‘dy krena’”.

Mero Baze, ashtu si Çili, të dy më afër PS-së, në “Top Story” ka thënë se Meta ka frikë koalicionin PS-LSI-PDIU. “Frika reale e Metës nuk  është numri i deputetëve por fuqia e tij për të qenë faktor vendimtar pas zgjedhjeve. Parimi politik i Metës është që nuk kanë rëndësi mandatet por mënyra se si i perdor ato. Meta po teston nëse ja vlen të dale i vetëm, të bjerë nga mandatet por të bëhet më i rëndësishëm, apo të rrijë në një koalicion që mund të marrë aq shumë sa atij nuk i vlen. Meta po kalkulon për një palë zgjedhje që atij i vlejnë në të gjitha aspektet… Nëse Meta hyn i vetëm në zgjedhje është kandidat për Kryeministër.”

Edhe analisti Artur Zheji bazuar në një shkrim të opinionistit dhe gazetarit kosovar Baton Haxhiut, thotë se e vetmja “Zgjidhje” është zgjidhja dhe ndarja e Koalicionit PSI-LSI, si një ndarje nga e “keqja”, për të shpëtuar “pjesën e mirë”, që është e përqëndruar te Rama dhe Kupola e tij.

“Muajt e fundit kemi pasur një marrëdhënie delikate mes koalicionit. Unë pajtohem me faktin që Ilir Meta, jo vetëm indirekt dhe në mënyrë virtuale kontribuon për ta mbajtur hapur atë çadrën e opozitës, duke e ushqyer me shpresë dhe duke bërë një lojë të dyfishtë, një aksion politik paralel dhe të mbivendosur me atë të opozitës, por duke e vonuar me qëllim dhe enkas përgjigjen për ftesat e përsëritura të Edi Ramës kohët e fundit, për një zgjatje të koalicionit… Ilir Meta mban ngërc shumë elementë në këtë ekuacion. Shtyrja e një fjale finale të cilën atij i takon ta thotë. (pra vazhdimi i koalicionit)”, kështu është shprehur analisti Skënder Minxhozi në emisionin e së enjtes në “Top Story”.

E ndërsa analistët thonë “të ndahen”, Rama dhe Meta takohen për një kafe tek Sofra e Ariut.

Kryeministria e ka mbajtur shumë të izoluar informacionin për takimin e sotëm mes dy liderëve të koalicionit qeverisës. Por burime për Tiranapost.al thanë se takimi Rama-Meta është një takim normal mes tyre.

Mbetet për tu parë nëse tjetër erë po fryn ose duhet të presim datën 1 prill…/