Kriza politike – Çfarë po ndodh?

Që prej 18 shkurtit, Partia Demokratike dhe aleatët e saj po protestojnë kundër qeverisjes së Kryeministrit Rama dhe kërkojnë formimin e qeverisë teknike, si e vetmja mundësi për të siguruar zgjedhje të lira e të ndershme.

Opozita nuk ka marrë pjesë në seancat parlamentare dhe nuk është regjistruar për të marrë pjesë në zgjedhjet e pjesshme vendore në Kavajë. Gjithashtu, PD ka deklaruar se nuk do të marrë pjesë në zgjedhjet e 18 qershorit nëse nuk formohet qeveria teknike.

Dje Zoti Basha theksoi vendosshmërinë për t’i shkuar deri në fund kauzës së nisur:

“Nga kjo betejë nuk tërhiqem pa i shkuar deri në fund vendimit që së bashku morëm, për qeveri teknike për zgjedhje të lira dhe të ndershme.”

Ndërkohë kryeministri Rama gjatë gjithë kësaj kohe i ka konsideruar kërkesat e PD-së jolegjitime. Ai është shprehur i vendosur për të zhvilluar zgjedhjet e 18 qershorit edhe sikur opozita të mos marrë pjesë.

Më 22 mars, duke iu drejtuar deputeteve të PS-së, Zoti Rama u shpreh:

“Sikur askush të mos dojë të hyjë në zgjedhje, PS do hyjë në zgjedhje dhe do të marrë të 140 deputetët e Kuvendit.”

Më 26 mars, Kryeministri Rama deklaroi:

“PD duhet ta harrojë qeverinë teknike dhe shtyrjen e datës së zgjedhjeve. As nuk bëhet fjalë që të humbasim kohë dhe energji në fushë betejën e improvizuar ku na thërret më kot Partia Demokratike.”

Ndërsa, më 2 prill në Asamblenë Kombëtare të PS-së, Zoti Rama u shpreh:

“S’është puna jonë dhe se kemi fare merakun se mund të mbetet vendi pa opozitë.”

Pas Asamblesë Kombëtare, në mbrëmjen e dy prillit, dy aleatët e koalicionit qeverisës Kryeministri Rama dhe Kreu i Kuvendit Meta, shoqëruar nga kryebashkiaku Veliaj dhe ministri i Drejtësisë Vasili darkuan së bashku. Në media u përfol se gjatë takimit ishte vendosur vazhdimi i koalicionit PS-LSI.

Por dje në mbrëmje, pas mbledhjes së Kryesisë së LSI-së, Zoti Meta, në një konferencë për shtyp, deklaroi:

“LSI vlerëson se vendi ka nevojë në mënyrë të veçantë për një qeveri të besimit për zgjedhje të gjithëpranuara.

LSI vendos të vërë në dispozicion të zgjidhjes së krizës politike në vend të gjitha mandatet e saj politike, që nga mandati i kryetarit të kuvendit, mandatet e ministrave si dhe të gjitha postet politike të përfaqësimit të saj. 

Nëse lidershipi i Partisë Socialiste nuk do të garantojë vullnet maksimal dhe dhënien e të gjitha garancive të mundshme për opozitën, që ajo të jetë pjesë e procesit zgjedhor, LSI jo vetëm nuk mund të jetë pjesë e një koalicioni të tillë, por as edhe një farse elektorale të mundshme.

LSI është e qartë që midis të majtës dhe të djathtës zgjedh të majtën, midis zgjedhjeve demokratike dhe farsës elektorale, zgjedh zgjedhjet demokratike.”

Pas deklaratës së Zotit Meta, priten reagime nga Kryeministri Rama nëse në vend do të zhvillohen zgjedhje me një parti të vetme apo nëse do të merren parasysh kërkesat e opozitës.