Kancelaritë kryesorë të botës kanë reaguar pas vendimit të Uashingtonit për të sulmuar Sirinë, pas vrasjeve me armë kimike të civilëve nga regjimi i Bashar Al Assad.

Britania e Madhe ka dhënë “mbështetjen e plotë” për vendimin e presidentit Donald Trump.

“Qeveria e Britanisë së Madhe mbështet plotësisht aksionin e SHBA, për të cilin ne besojmë se është një përgjigje e përgjegjshme ndaj sulmit barbar me armë kimike i kryer nga regjimi sirian, dhe ka për qëllim të parandalojë sulme të tjera”, thuhet në reagimin e qeverisë britanike.

Izraeli ka dhënë gjithashtu mbështjete për Trump, duke paralajmëruar edhe regjimet në Iran e Korenë e Veriut.

“Si me fjalë ashtu edhe me veprime, presidenti Trump dërgoi sot një mesazh shumë të qartë dhe të fortë se përdorimi i armëve kimike nuk do të tolerohet. Izraeli mbështet plotësisht vendimin e presidentit Trump dhe shpreson se ky mesazh i vendosmërisë kundër veprimeve të tmerrshme të regjimit të Assad, do të ndikojë jo vetëm në Damasak, por edhe në Tehern dhe Pehnian”, thuhet në reagimin e zyrës së shtypit të kryeministrit Benjamin Netanyahu.

Arabia Saudite është një tjetër shtet me interesa në Siri që ka mbështetur aksionin e SHBA.

“Mbretëria e Arabisë Saudite mbështet plotësisht operacionin ushtarak amerikan ndaj objektivave ushtarake në Siri, që ka ardhur si përgjigje ndaj përdorjes së armëve kimike nga regjimi sirian, kundër civilëve    të pafajshëm”, thuhet në reagim.

Edhe Australia ka dhënë mbështetje për Uashingtonin.

“Qeveria e Australisë mbështet fuqimisht një përgjigje të shpejtë dhe të drejtpërdrejtë të SHBA. Është përgjigje proporcionale që dërgon një mesazh të fortë te regjimi i Assad”, ka thënë kryeministri Malcolm Turnbull.

Ndërkohë, Rusia e ka konsideruar veprimin e SHBA ndaj Sirisë si një agresion kundër një populli sovran.  Kremlini ka paralajmëruar se sulmet e SHBA “dhunojnë ligjin ndërkombëtar” si dhe do “dëmtojnë shumë” marrëdhëniet e Rusisë me SHBA.

Moska ka paralajmëruar gjithashtu se po konsideron mundësinë e ndërprerjes së bashkëpunimit ushtarak me amerikanët. Vladimir Putin ka qenë personalisht i përfshirë në gjetjen e një zgjidhje për luftën civile në Siri, i mbështetur nga presidenti turk Rexhep Taip Erdogan dhe nga Irani.

Irani është një tjetër kundërshtar i SHBA që ka dënuar sulmin. Teherani e ka konsideruar të paranueshëm dhe me pasoja veprimin e amerikanëve ndaj Sirisë.

Sa i përket Europës, kancelaritë kryesore nuk kanë reaguar ende. Përfaqësuesja e lartë e BE, Federica Mogherini është përgjigjur shkurt se kishte dijeni për sulmet që do ndërmerrte SHBA.