‘E drejta e medias ‘ i Brikena KASMIT, Libri i parë akademik në lidhje me lirinë e shprehjes si e drejtë publike

Brikena Kasmi sjell librin “E drejta e medias”

Libri i autores Brikena KASMI është libri i parë akademik i këtij lloji, që synon të japë një informacion akademik në lidhje me lirinë e shprehjes si e drejtë publike dhe lirinë e të bërit biznes si e drejtë private.

Shpërndarja e informacionit nëpërmjet platformave të ndryshme shërben për shpërndarjen e informacionit për publikun dhe shpërndarjen e informacionit ndër personal. Platformat e ndryshme mediatike kanë sjellë dhe një konfuzion të individit në lidhje me aplikimin e rregullave për shpërndarjen e informacionit.

Zhvillimi i teknologjisë në përmasat e tij ka forcuar rolin e medias në ndarjen e pushteteve në një demokraci të konsoliduar dhe si i tille kërkon vëmendjen e shteteve ndaj krimit kibernetikë, i cili në rastet më të thjeshta dëmton të drejtat e ligjshme të një individi.

Libri synon të japë njohuri mbi format e medias, funksionim e tyre, ushtrimin e lirisë së shprehjes, formave të cenimit të të drejtave dhe lirive të tjera dhe zbatimin e parimit të proporcionalitetit në lirinë e shprehjes, aplikimin e kritereve bazë gjatë evidentimit të shkeljeve apo ndërhyrjeve të shtetit në lirinë e shprehjes nga media. Nga ana tjetër në kuadër të teknologjisë së informacionit, libri synon të shpjegojë disa nga sfidat e njerëzimit në kuadër të krimit kibernetik dhe cenimit të reputacionit të personit online. Një vëmendje e veçantë i është dhënë në këtë libër pasqyrimit të praktikës gjyqësore shqiptare dhe evropiane për të mundësuar njohjen e standardeve të aplikimit të lirisë së shprehjes në konkurrencë dhe me të drejtat e tjera themelore te individit.

Libri përmban rreth 22 trajtime të ndara sipas 5 kapitujve. Në kapitullin e parë Media dhe liria e shprehjes pasi jepet një shpjegim në lidhje me teza dhe përkufizime të ndryshme për median, jepen trajtimet ligjore të konceptit të lirisë së shprehjes. Në këtë kapitull trajtohen Fjalimet irrituese apo ato me bazë urrejtje dhe dallimet e tyre gjatë aplikimit nga format e ndryshme të medias. Libri shpjegon aspektet ligjore, historikun dhe parashikimet në instrumentet ndërkombëtare si dhe legjislacionin shqiptar në lidhje me lirinë e shprehjes.