Gati oferta e re për De Biasin

Sportitalia raporton se Gianni De Biasi-t i kanë mbërritur ofertat e para pas vendimit për t’u larguar nga Kombëtarja e Shqiptare.

Skudra kineze, Tianjin Teda, ka shfaqur interes për të siguruar shërbimet e trajnerit italian, të cilit pritet t’i bëjë një ofertë zyrtare.

Kjo skuadër duket se ka një fiksim të vjetër me trajnerët që kanë drejtuar Shqipërinë. Nga viti 2009 deri në 2011 drejtimin e Tianjin Teda e mori Arie Haan, i cili sapo ishte larguar nga kuq e zinjtë.

Në janar të 2012-ës, Haan u zëvendësua nga një tjetër trajner që ishte larguar nga Shqipëria, Josip Kuze, por ky i fundit qëndroi shumë pak në Kinë, deri në maj të 2012-ës. Arie Haan u rikthye në drejtimin e Tianjin Teda në sezonin 2014-2015.

Tashmë synimi tjetër i skuadrës kineze është De Biasi, por tekniku italian nuk do të nxitohet me vendimin e tij, pasi mësohet se oferta po i  vijnë edhe nga Spanja.