Milani i ri, i biznesmenit kinez Yonghong Li, dhe i drejtuar nga administratori i deleguar Marco Fassone, synon një rritje të fortë të të ardhurave në pesë vitet e ardhshme.

Siç shkruan gazetari i Il Sole 24 Ore, Carlo Festa, në blog-un e tij Insider, plan-biznesi i Milanit për 2018-2022, parashikon rritjen e të ardhurave nga 206,3 milionë në sezonin 2015/2016 dhe 196,2 milionë në sezonin 2016/2017 në 273 milionë euro në fund të vitit 2018, për të arritur në 426,2 milionë në fund të 2019-s; 447,5 milionë në 2020-n; 486,1 milionë në vitin 2021, për ta mbyllur me 524 milionë në sezonin 2021/2022, pra më shumë se dyfishi i qarkullimit nëse i krahasojmë me të ardhurat aktuale.

Siç shpjegon gazetari Festa, rritja e vërtetë do të ndodhë në tregun kinez, ku është duke u krijuar kompania e re Milan China. Sipas plan-biznesit, duke filluar nga sezoni i ardhshëm, parashikohet një rritje të ardhurash me 90 milionë euro më shumë.

Plan-biznesi i Milanit dhe burimet e tjera të të ardhurave

Për sa u përket burimeve të tjera të të ardhurave, në plan-biznesin e Milanit, të ardhurat nga të drejtat televizive (të drejta ekskluzive televizive në kompeticionet e UEFA) duhet të rriten nga 98 milionë në 2016/2017 në 107 milionë në fund të vitit 2022.

Të ardhurat nga sponsorët duhet të rriten nga 76 milionë euro në vitin 2017 në 84 milionë euro në vitin 2022. Sipas parashikimeve, të ardhurat nga stadiumi duhet të rriten nga 22 milionë në vitin 2017 në 40 milionë në vitin 2022.

Në fund, të ardhurat nga të drejtat televizive të UEFA duhet të rriten nga 46 milionë në sezonin 2018/2019, kur parashikohet rikthimi në Champions League, në 68 milionë euro në sezonin 2021/2022.

Por, të ardhurat nga Champions League lidhen me rezultatet. Qëllimi është që në sezonin 2018-2019 dhe 2019-2020, Milani të arrijë në fazën e 16 më të mirëve në Champions League; në sezonin 2020-2021 në çerekfinale dhe në sezonin 2021-2022 në gjysmëfinale.