Sa të sigurta janë vaksinat?

Por pavarësisht kësaj, ekspertët e shëndetit në vendin tonë sigurojnë se të gjitha vaksinat që përmban Kalendari Shqiptar i Vaksinimit dhe që ofrohen nga Programi Kombëtar i Vaksinimit, janë vaksina të parakualifikuara nga Organizata Botërore e Shëndetësisë (OBSH) dhe kanë kaluar një sërë testesh laboratorike dhe sigurie.

Sipas tyre, shumica e problemeve që mendohet se kanë lidhje me administrimin e vaksinës, nuk kanë lidhje me vetë përbërjen e vaksinës. Shumë prej tyre janë situata shëndetësore që ndodhin në të njëjtën kohë me vaksinimin. Ky është veçanërisht rasti për ngjarjet që ndodhin gjatë vitit të parë të jetës, kur vaksinat jepen rregullisht.

“Ekspertët e Institutit të Shëndetit Publik bëjnë me dije se ngjarjet që ndodhin në vitin e parë të jetës së fëmijës mund të përkojnë me kohën që është marrë një vaksinë. Vaksinat mund të prodhojnë disa situata shëndetësore të padëshirueshme anësore, të tilla si dhimbje dhe skuqje në vendin e injektimit ose ethe, por shumica e reaksioneve janë të lehta dhe zgjidhen shpejt”, shkruan Dita.

Po sipas këtyre burimeve, zakonisht nuk është e mundur të parashikohet se kush mund të ketë një situatë shëndetësore të lehtë dhe kush mund të ketë një reaksion të rrallë dhe serioz ndaj kryerjes së një vaksine.

Megjithatë, rreziku i situatave shëndetësore të dëmshme mund të minimizohet duke ndjekur udhëzimet se kur duhen, apo nuk duhen përdorur vaksinat.