‘France 24’, Rama: Në Shqipëri është e modës të kërkohet dorëheqja

Gazetarja e pyeti nëse Rama po mendonte të jepte dorëheqjen, duke u bazuar dhe tek protesta e ndodhur më 26 maj, por ai iu përgjigj duke i thënë se “Shqipëria ka parë manifestime më të mëdha”.

Rama u shpreh se vendi në udhëheqjen e qeverisë aktuale ka patur rezultate konkrete në luftën kundër krimit dhe korrupsionit dhe për këtë arsye, KE-ja rekomandoi hapjen e negociatave.

I pyetur për rezultatet konkrete në luftën kundër drogës, Rama tha:

“Kemi shumë rezultate që janë themelore. KE nuk do të bënte rekomandimin pa kushte të hapjes së negociatave në të kundërt. Jemi të ndërgjegjshëm se ka ende për të bërë. Nuk jemi duke trokitur në dyert e BE-së për t’u bërë anëtarë, por jemi duke u përgatitur për hapjen e negociatave. Kjo është një punë në vazhdim.”

Gazetarja ka thënë se ndihet një lloj kriticizmi në Europë lidhur me hapjen e negociatave, dhe Rama e ka pohuar se ekziston diçka e tillë.

“Po, vjen nga brenda BE-së. Ka shumë arsye dhe një prej tyre është më themelorja. Sot Europa po jeton një çast që brezi i ri i sotëm nuk e ka njohur luftën. Unë isha ministër kulture kur patëm një luftë të tmerrshme, kur u detyruan që 600 mijë shqiptarë të Kosovës të vijnë në Shqipëri.”

I pyetur nëse ka patur përshtypje se në Samitin e Ballkanit dyert e BE-së u hapën për Shqipërinë, kreu i qeverisë tha:

“Nuk bëhet fjalë për zgjerim, por për të shkuar drejt thellimit të Unionit përpara se të zgjerohet. Si dhe një thellim të reformave përpara se të bëhemi anëtarë.”