Dyfishohen lejet e ndërtimit, INSTAT nxjerr listën e qyteteve të prekura

Instituti i Statistikave ka bërë me dije dje se janë dyfishuar lejet e ndërtimit të dhëna në vend për tre muajt e parë të vitit.

Në të gjithë vendin në total janë dhënë 221 leje ndërtimi për ndërtesa të reja, për periudhën janar –mars të vitit 2018. Krahasuar me të njëjtën periudhë të vitit 2017, lejet e ndërtimit janë rritur 118 për qind. Edhe sipërfaqja e miratuar për ndërtimet e reja është dyfishuar në krahasim me një vit më parë.

Sipas Institutit të Statistikave, vlera e përafërt e lejeve të ndërtimit miratuar për ndërtesa dhe punime inxhinierike, në tremujorin e parë të vitit 2018 është 10,2 miliardë lekë, nga 11,1 miliardë lekë miratuar në tremujorin e parë të 2017-s. Ky tregues, në tremujorin e parë të vitit 2018, krahasuar me të njëjtin tremujor të një viti më parë, u ul me 7,6 për qind.

Sipas statistikave zyrtare në Tiranë, numri i lejeve të ndërtimit është 65, nga 43 leje ndërtimi që ishte një vit më parë. Këtyre lejeve në kryeqytet u korrespondon një sipërfaqe prej 103,507 metra katrorë, që është më shumë se 2,5 herë më e lartë në krahasim me të njëjtën periudhë të një viti më parë. Sipas rretheve; në Durrës u dhanë 23 leje ndërtimi, nga 11 leje ndërtimi që u dhanë një vit më parë, në Elbasan 19 leje, ndërsa në Fier 33 leje ndërtimi, nga 7 leje që u dhanë një vit më parë.