Universitetet private gjithnjë dhe më me pak studentë?

Universitetet private në Shqipëri, të cilat dolën si kërpudhat pas shiut, duket se së fundi po përjetojnë periudhën e tyre më të keqe.

Universiteti publik po i sfidon haptazi dhe me gjithë propagandën që bëjnë privatët, në vitin universitar 2017-2018, universitetet publike kanë regjistruar 18 364 studentë, ndërsa privatët 4054, pra 4.5 herë më pak.

Shifra në rënie për të gjithë universitetet private në katër vitet e fundit, përjashtuar këtu universitetin Epoka që ruan gati të njëjtin numër studentësh të regjistruar, Polis, që në tre vitet e fundit ka një situatë stabël, Zoja e Këshillit të Mirë gjithashtu. Pjesa tjetër ka regjistruar ulje në numrin e studentëve.

Albanian University, nga 2540 studentë që regjistronte në vitin akademik 2014-2015, në vitin e fundit ka regjistruar vetëm 460 studentë, pra 5 herë më pak studentë se katër vite më parë.

Universiteti Europian i Tiranës në vitin 2013 regjistronte 1382 studentë. Në vitin 2014, 1066, pra 30% më pak. Në vitin 2017-2018, ka regjistruar 624 studentë, pra gjysmën e atyre të pesë viteve më parë.

Universiteti publik, në total në vitin 2014-2015, ka 18 231 studentë të regjistruar, ndërsa në vitin e fundit akademik në vitin 2017-2018, këtë që po mbyllet kanë 18 364.

Universitetet private, nga rreth 8 mijë regjistrime në vitin 2014-2015, në vitin e fundit akademik kanë vetëm 4044 studentë të pranuar, këto të shpërndara në dy akademi, në dhjetë kolegje, në katër shkolla të larta dhe në tetë universitete.

Katastrofën më të madhe të regjistrimeve sipas të dhënave zyrtare nga ministria e Arsimit, krahasuar me pesë vite më parë, e ka Albanian University me pesë herë më pak studentë dhe UET me dy herë më pak studentë se pesë vite më parë.