Mohoi dhunën, Basha: Xhisiela mbrojti veten dhe familjen e saj

Rrëfimi i Xhisiela Malokut ka ngjallur reagimin e kreut të Partisë Demokratike, Lulzim Basha. Përmes një statusi në rrjetet sociale në orët e vona, Basha qëndron në krah të ish-të dashurës së Rexhep Rrajës, djalit të deputetit të PS, Rrahman Rraja, e cila rrëzoi dëshminë e parë, duke mohuar dhunën e ushtruar ndaj saj.

Sipas Bashës ky fakt është tronditës, pasi sipas tij Xhisiela mbajti këtë qëndrim për të mbrojtur veten dhe familjen e saj.

Reagimi:

Është tronditëse të shohësh një të mbijetuar të përdhunimit dhe të dhunës të mohojë përdhunimin dhe torturën për të mbetur gjallë!
Xhisiela e di shumë mirë se çfarë kriminelësh gjakftohtë dhe të pamëshirshëm janë ata, ai që e përdhunoi dhe ata që e mbrojnë përdhunuesin, ndaj ajo bëri sot atë që bën çdo njeri i tmerruar që kërkon të mbijetojë: mbrojti veten dhe familjen e saj.
Rrahman Rraja është pjesë e një prej bandave kriminale që sundojnë dhe terrorizojnë Shqipërinë. Sot në Shqipëri nuk ka më as polici, as prokurori, as drejtësi as parlament. Parlamenti dhe drejtësia kanë rënë, dhe në vend të tyre sundon banda e Ramës, Rrajëve, Habilajve, Bajrëve, Shullazëve me shokë.