ATSH-ja duhet mbyllur

Nga Eden Kollçinaku

Hyrja e kapitalizmit dhe lirisë së tregut në Shqipërinë e viteve 1991 solli me vete edhe alternativat e reja mediatike, të cilat arritën të implementonin brenda vetes së vet standardet perëndimore dhe, njëkohësisht, të modernizonin tregun mediatik shqiptar. Duhet të them se në atë kohë, monopoli mediatik i shtetit përbëhej nga Radio Televizioni Shqiptar (RTSH), gazeta Zëri i Popullit dhe Agjencia Telegrafike Shqiptare (ATSH); pra ishin zëri i propagandës së shtetit tonë komunist.

Megjithatë, edhe pse sistemi totalitar komunist rra dhe ia la vendin një sistemi të ri dhe modern, programet qeveritare mediatike si RTSH dhe ATSH i mbijetuan këtij ndryshimi. Ndërkohë, gazeta Zëri i Popullit u trashëgua nga Partia Socialiste dhe më pas u la të privatizohej.

Ajo që më bën më shumë përshtypje është mungesa e një diskutimi rreth kësaj çështjeje. Vështirë të hapësh televizorin dhe të dëgjosh një panel analistësh të debatojnë për mediat shtetërore. Në internet edhe mund të gjesh ndonjë artikull tek-tuk, por përsëri, debati mbahet larg syve të njerëzve; aq larg sa të bën të mendosh se është një tabu.

Më shumë doja të flisja për ATSH-në, e cila është një agjenci lajmesh, e mbajtur hapur vetëm nga paratë e taksapaguesve shqiptarë. Nuk dua t’a bëj këtë një çështje ideologjike, por një qytetar mesatar nuk ia ka idenë se çfarë do të thotë emri “Agjencia Telegrafike Shqiptare”, e jo më të dijë, pastaj, se kjo agjenci mbahet nga paratë që atij ia merr shteti.

Normalisht, për kohën që është krijuar kjo agjenci, shteti ka qenë investitori i vetëm, pasi askush nuk mund t’a merrte këtë iniciativë. Sidomos, kur bëhej fjalë për një teknologji për të cilën shqiptarët s’kishin dëgjuar ndonjëherë. Por, rrënia e shtetit socialist solli një frymë të re për Shqipërinë — një treg të hapur dhe konkurrues, sidomos për mediat.

Sot, media ka evoluar dhe është modernizuar aq shumë, sa nuk na dalin dot gishtat për të numëruar gjithë portalet, radiot dhe kanalet televizive. Për mua, nuk ka nevojë që shteti të konkurrojë paralelisht me sektorin privat. Por ka nga ata njerëz që ende mbështesin atë teorinë Piguviane, që këto subjekte mediatike janë në interes të publikut. GABIM! Nëse dikush nga ju hap portalin e ATSH dhe fillon të lexojë lajmet nga aktualiteti, do të dalë në konkluzionin se po lexon zyrën e shtypit të kryeministrisë. Nuk është se po ndodh vetëm tani, ka ndodhur edhe më parë.

Ndërkohë që shkruaj për ATSH-në, më kujtohet një screenshot që kam kapur që në datën 18 Tetor 2018, të një postimi të sponsorizuar të ATSH në Facebook.

Përse gjithë kjo reklamë për një agjenci qeveritare? Askujt nuk i bie ndërmend për ATSH-në; përveç atyre agjencive mediatike që duan të marrin lajmet e gashtme. Për më tepër, me çfarë karte krediti është bërë pagesa për reklamën në Facebook dhe paratë e kujt u përdorën për të bërë transaksion?

Nuk kam asgjë kundër stafit të punonjësve të ATSH, por jam kundër ATSH si institucion qeveritar. Dhe duhet mbyllur! Janë para të shpërdoruara në mënyrën më të keqe të mundshme. Tregu jonë i pasur mediatik është zhvilluar dhe ka evoluar shumë. Ndërkohë, unë nuk njoh ndonjë njeri që të thotë se ka nevojë për një agjenci si ATSH. Përkundrazi, njoh shumë persona që mendojnë se këto programe qeveritare janë thjesht një barrë më shumë mbi kurrizin tonë.