Politika Shqiptare, e zgjuar, e djallëzuar, apo asnjëra?!

Nga Ardit Haxhija

Prof. Në universitetin Amerikan / Middle East University

Reforma në drejtësi pas 6 vitesh, numëron shumë gjyqtarë dhe prokurorë të zënë në faj dhe të përjashtuar nga sistemi.

Mund të ishte bërë shumë më shumë, por në një vend të kapur nga e keqja, prapë shumë është bërë. Kjo, jo për meritë të njërës apo tjetrës palë, por vetëm të atyre që Kosovën e bënë shtet dhe Shqipërinë e shohin si vend strategjik në Ballkanin e zhurmshëm dhe të rrëmujshëm.

Ne gjithë këtë ndryshim, ajo që me pak mundim kuptohet është roli i politikës shqiptare. Njëra palë e paraqet si sukses të vetin, ndërsa pala tjetër e sheh si betejë të humbur. Njëra palë shantazhon palën tjetër me SPAK-un që po u afron dita ditës, ndërsa pala tjetër shpik lloj lloj disidentësh, duke linçuar këdo që i del para.

Nëse reforma në drejtësi është rruga e duhur për ne (unë e besoj dhe dua ta besoj deri në fund) i bie që nuk do pyesë për të majtë apo të djathtë. I bie që pjesa më e madhe e kabinetit të qeverisë aktuale do përballet me të njejtën reformë.

Kujtojmë këtu  drogën, tendera korruptivë, skandalet e njëpasnjëshme (unaza e Tiranës ose përfshirja direkte në blerje votash) e sa e sa raste të tjera të ngjashme.

Nëse reforma në drejtesi nuk është rruga e duhur gjë që nuk dua ta besoj, i bie që e gjithe kjo është një farsë ku në fund do shpëtojnë të gjithë, ndërsa Shqipëria do vazhdojë me të njëjtat halle.

Me sa dimë deri tani, reforma në drejtësi u bë nga të huajt pa dëshirën e asnjerës palë.

Dhe reforma po vazhdon nga të huajt pa dëshirën e asnjerës pale.

Por nga ana tjetër më habit fakti sesi po këta të huaj pranuan zgjedhje një-partiake dhe nuk doli kush të thoshte qoftë dhe një ankesë.

Atëherë politikanët tanë ose janë aq të zgjuar sa e kuptojnë kush do arrestohet e kush jo, ose janë shumë të djallëzuar sa e kane kurdisur gjjthë këtë farsë, ose ose nuk ia kanë idenë fare se çfarë po ndodh.

Ndërsa ne të mbajmë gjallë shpresën se ndoshta kësaj here, të huajt e kane marrë në dorë fatin e vendit njëherë e mirë, dhe do bëhëmi dhe ne vend normal i Europës së madhe…