Ditën e sotme në emisionin Open në TCH ka qenë në lidhje telefonike një person i cili sipas prezantimit ka rezultuar pozitiv me Koronavirus dhe ka treguar përjetimet e tij.

“Jam ushqyer si gjithmonë. Kur kam pas temperaturë kam pirë paracetamol, ujë, lëngje, supë. Është çështje paniku më shumë, është diçka e menaxhueshme. Është më pak se një grip normal” – thotë ai.

Lajme të tilla të shërimeve me supë duhen përcjellë tek publiku në kontekste më serioze editimi, shoqëruar me të dhëna shkencore dhe raste krahasuese; ose duhen shmangur.

Veçanërisht në këtë fazë të shpërndarjes së epidemisë, mahnitja e pamend me to nuk i bën mirë asaj që është përcaktuar tashmë si rruga e vetme e përballjes me virusin: distancimit social.

Të njëjtin ‘lëng supe’ shpërndan edhe KM-ja.

“U shërua babai i pacientit zero”- u njoftuam me daulle nga Sureli.

Pacientit ende nuk i ësht= kryer testimi final. Shërim i urojmë gjithsesi, por mund ta publikonte Spitali në kohën e duhur dhe me dozën e duhur të profesionalizmit.

E kemi thënë dhe e përsërisim:

Këto fishekzjarre emocionesh politike duhen shmangur. Sidomos me Covid-in.

Kjo situatë ku gjendemi nuk pranon fryrje dhe shfryrje për nevojat e humorit politik të ditës, por vendosmëri, seriozitet, maturi, plan të përpiktë financiar afatgjatë.

Mbi të gjitha, korrektesë dhe transparencë me opinionin publik, respekt për të, jo supën e prishur të propagandës.

Teprimet bajate me këtë të fundit kanë sjellë në të shkuarën e afërt kalimet e dëmshme nga ekstremi në ekstrem.

Secili, punën e vet. Dhe pozitivizëm real, jo populizëm për naivë.