Shumë gjëra që i ka thënë botës bashkëthemeluesi i “Microsoft”, Bill Gates, kanë rezultuar të vërteta, përfshirë edhe parashikimin për virusin që ka frikësuar tokën.

Dhe ndërsa njoftoi se do të bënte një komunikim online ku njerëzit mund ta pyesnin për gjithçka, shumica e tyre ishin kuriozë të dinin ndonjë informacion apo mendim që mund të kishte ai për koronavirusin.

Ai tha se nëse merren dy masat e duhura, testimi dhe izolimi, atëherë vendet mund t’i rikthehen normalitetit për 6-10 javë.

“Duhet të rrimë të qetë. Edhe pse është një situatë e paprecedentë. Ajo që ndodhi në Kinë është skenari më kritik që kemi. Ata u izoluan dhe ishin në gjendje të zvogëlonin numrin e rasteve. Ata e shmangën përhapjen e infeksionit më tej. Nëse një vend bën një punë të mirë në dy fronte – në testimin e njerëzve për virusin dhe zbatimin e kufizimeve – atëherë brenda 6-10 javësh ai vend mund të ketë shumë pak raste të reja dhe do jetë në gjendje t’i kthehet sërish normalitetit”, tha Gates.

Bill Gates i qëndroi ide së shprehur edhe më parë se bio-terrorizmi mund të vrasë miliona njerëz, por ne jemi të papërgatitur

Ai shtoi se vendet e pasura janë më të goditurat tani, por pasojat në vendet në zhvillim do jenë gjithashtu shqetësuese.

“Shqetësohem për të gjitha dëmet ekonomike, por akoma më keq do të jetë mënyra sesi kjo do të ndikojë në vendet në zhvillim, të cilat nuk mund të bëjnë distancimin shoqëror në të njëjtën mënyrë si vendet e pasura dhe aftësia spitalore e të cilëve është shumë më e ulët” – tha ai.

Një nga këto vende me vetëdije të ulët mbi rrezikun është edhe vendi ynë.