Kryesore
Si të shpëtojmë nga “debilat” e administratës shtetërore
Me anë të bursave shtetërore të sponsorizuara 100% nga shteti, studentëve të ekselencës t’u mundësohet studimi në nivelin Baçelor apo Master në universitetet më të mira të botës.Pas mbarimit të studimeve, t’u sanksionohet me ligj kthimi në vendin e tyre dhe të punojnë në administratën shtetërore për një periudhë jo më pak se 4 – vite.
Si të shpëtojmë nga “debilat” e administratës shtetërore – Koment nga Ardit Haxhija
Afrimi i zgjedhjeve sjell formacionet politike me programe të ndryshme. Sigurisht në plan të parë, programet janë korrekte dhe ambicioze. Programet në vetvete sjellin eksperiencat më të mira të vendeve perëndimore.
Por po ti hedhim një sy programeve të secilës forcë, nuk gjejmë ne asnjë vend një pikë që lidhet me fondin e ekselences. Nisur nga praktikat më të mira evropiane, sugjerim me vlerë për programet qeverisëse në këtë prag zgjedhjesh, do të ishte përfshirja e bursave të ekselencës për të rinjtë që duan të studiojnë jashtë vendit.
Po ti hedhim nje sy faqes së ministrisë, do vërejmë që ekziston një fond i tillë por jo në formën për të cilën do flasim më poshtë. Me anë të bursave shtetërore të sponsorizuara 100% nga shteti, studentëve të ekselencës t’u mundësohet studimi në nivelin Baçelor apo Master në universitetet më të mira të botës. Pas mbarimit të studimeve, t’u sanksionohet me ligj kthimi në vendin e tyre dhe të punojnë në administratën shtetërore për një periudhë jo më pak se 4 – vite.
Në këtë mënyrë studenti do përfitojë një shkollim evropian të mundësuar nga shteti i tij. Ndërsa shteti do perfitojë një profesionist të mirëfilltë i cili do i shërbejë shtetit të tij duke ia kthyer mrapsht investimin e bërë.
Në këtë mënyrë, brenda 8 viteve do të kemi një administratë shumë herë më të kualifikuar e të përgjegjshme se kjo që kemi sot. Në të njëjtën kohë do krijojmë një sistem meritokracie duke i kthyer shkollës vlerën e merituar. Konkurrenca dhe transparenca duhet të jenë shoqëruesit e këtij procesi. Po të shohim ndër vite, përfituesit e bursave te ekselencës janë fëmijë politikanësh apo biznesmenësh duke mos pasur asnjë lloj detyrimi që të shërbejnë në vendin e tyre.
Edukimi, thoshte Nelson Mandela, është “arma” më e fuqishme që mund të përdorësh për të ndryshuar botën. Ta perdorim këtë “arme” për të ndryshuar vendin tonë duke u rikthyer me dinjitet në sytë e rajonit dhe më gjërë.
