Nga Sebastjan Zonja

– Duke marrë shkas nga largimi i (ish) kryeinfermieres së Infektivit Ana Luca në drejtim të Gjermanisë dhe shumë portaleve “qeveritare” që e kanë bërë rrugë çdo dy javë nga një lajm ku na thonë se shqiptarët janë dembela.

Portale afër qeverisë, dhe në marrëdhënie më të afërt me përfitues tenderash korruptivë, kanë nisur të normalizojnë një ide se shqiptarët janë dembelë.
Më herët ka qenë kryeministri Rama që na tha se punë ka, por s’ka profesionistë. Pastaj, kur shoqëria shqetësohet se profesionistët ikin në vende të tjera, kryeministri na qetëson duke na thënë se ka plot bangladeshas.
Menjëherë, ajo që të shkon në mendje është se si ka mundësi që shumë portale të ashtuquajtur të majtë nuk ngrenë problemin e mungesës së organizimeve sindikale, por janë të shqetësuar se në vendin tonë ka shumë dembela.

Kush është ai që ikën me qejf nga vendi i vet, familja dhe miqësia, apo jo miq?

Çudia vijon më tej se si ka mundësi që të bashkëjetojë një filozofi politike e majtë që nuk bën pyetjen nëse zbatohet Kodi i Punës për punonjësin, por kërkon të kënaqë orekset e ndonjërit që ka themeluar monopol.

Shihni sponsorat miq, dhe e kuptoni atë që thotë Orwelli, se nuk është më gazetari, por marrëdhënie me publikun në funksion të biznesit dhe qeverisë ajo që po bëjnë.

Të majtë e të djathtë, marksistë e smithianë, e dinë se monopoli e shkatërron ekonominë.
Po ashtu, të majtë e të djathtë, neomarksistë dhe fridmanianë, e dinë se sindikata është çështje e shtetit të së drejtës, jo e propagandës ideologjike.
Fundja, zotëruesve të këtyre portaleve që mbijnë kudo me fonde oligarkësh, me fonde qeveritare, me komente të paguara nga paratë e socialistëve e demokratëve, që shkruajnë e trumbetojnë se shqiptarët janë dembelë, u duhet thënë se shqiptarët nuk janë skllevër, dhe kur t’i shihni ndonjëherë në rrugë, Pështyjini!
Janë shumë të zinj për të qëndruar indiferent ndaj tyre.