Këshilli Bashkiak i Vlorës prej rreth dy javësh është duke i kërkuar kryebashkiakut Dritan Leli një mbledhje urgjente në teatrin ”Petro Marko” që të jepte llogari për punët e pabëra në qytet, por ai ka refuzuar gjithmonë të bëhet pjesë e takimit duke i vënë në dukje këshillit se po shkelte masat anti-covid dhe është futur gjithmonë përmes platformës online “Zoom”.

Nga argumenti i refuzimit të Lelit, sekretari i Këshillit Agron Gjipali ka komunikuar me përfaqësuesit e lartë të Ministrisë së Shëndetësisë duke kërkuar një konfirmim mbi ligjshmërinë e realizimit të mbledhjes fizike në sallën e teatrit “Petro Marko”.

Në përgjigjen e saj, zv.ministrja e Shëndetësisë Mira Rakacolli konfirmon se mbledhja mund të mbahet fizikisht, pasi sipas saj, urdhri për mosgrumbullimet nuk cënon aktivitetin e Këshillit Bashkiak.

“Përsa i përket Urdhërit të  Ministres së Shëndetësisë ‘Për ndalimin e grumbullimeve në vende të mbyllura apo te hapura’ qëllimi ka qenë ndalimi i grumbullimeve të posaçme, që sikundër përmendet në urdhër lidhet me tubimet, konferencat, mbledhjet partiake, ceremonitë  festive etj. ku rreziku i trasmetimit të virusit është shumë i lartë. Përsa më sipër ky urdhër nuk cënon aktivitetin e Këshillit Bashkiak, pasi zhvillimi i  mbledhjeve është vijimësi e punës së Këshillit Bashkiak, një praktikë që përdoret edhe nga institucione të tjera që punën e tyre e mbështesin mbi organe kolegjiale. Sot Vlora paraqet një situatë epidemiologjike të mirë, pa asnjë rast Covid. Sigurisht, këto mbledhje duhet të zhvillohen në përputhje me protokollet anti-Covid të miratuara si respektimi i distances, mbajtja e maskes, kushtet higjenosanitare etj”, thuhet në përgjigjen e Rakacollit.

Pas zgjedhjeve të 25 Prillit, ka filluar një përplasje mes PS-së dhe kryebashkiakut të Vlorës Dritan Lelit, pasi ky i fundit refuzoi kryeministrin Rama për të kandiduar për deputet. Pas këtij momenti, ai është përjashtuar nga PS dhe është sulmuar shpesh nga zyrtarët socialistë të qytetit bregdetar.