Mos u lani në Bunë, është shumë pis

Buna është lumi që këtë vit duhet t`i qëndrosh larg. Askush nuk mund të përdorë ato ujëra dhe as brigjet që nga kjo kohë e në vazhdim ndërsa alarmi jepet nga një zë që vjen nga shëndetësia. Të dhënat janë alarmante kur kujtojmë se Buna është një nga lumenjtë më të bukur të vendit tonë, ndërsa asnjë zë zyrtar nuk bën me dije ndonjë masë konkrete për ndërhyrjen që mund t`i bëhet për të ndryshuar fatin e ndotjes së atij lumi. Burimet nga sektori i Higjienës në Shkodër tregojnë se duhet të qëndrohet larg këtë vit, ndërsa është mësuar se për pastrimin kostoja është aq e lartë sa pushteti vendor e ka të pamundur ta zotërojë, ose të paktën ky është pretendimi i zyrtarëve lokalë.

Ndotja

Qytetarët shkodranë nuk duhet që këtë sezon turistik të lahen në ujërat e lumit Buna pasi ai është i ndotur dhe rrezikon epidemi. Kjo pohohet nga shefi i higjienës pranë Drejtorisë së Shëndetit Publik në Shkodër, Burim Gjyli, i cili shpjegon se ujërat e lumit Buna kanë ndotje të konsiderueshme nga rrjedhja në to e ujërave të zeza, por dhe nga mbeturinat që hidhen aty. Shkarkimet e ujërave të zeza në lumin Buna kanë sjellë ndotje dhe këshillohen qytetarët që të mos lahen në këtë lumë por t`i drejtohen vendeve të tjera në qytetin e Shkodrës siç janë liqeni dhe lumenjtë Drin e Kir, të cilët janë të pastër.

Sipas mjekut Burim Gjyli ndotja e lumit Buna është një problem mjaft shqetësues dhe pastrimi i tij kërkon një kosto të lartë dhe të pamundur. Aktualisht në këtë lumë ka derdhje të shumta të ujërave të zeza që vijnë nga centralet që punojnë me kapacitet të plotë dhe kanë rrjedhje të mëdha. Ndaj është mirë që gjatë sezonit veror të mos përdoret për të bërë plazh ditor lumi Buna. Lidhur me liqenin e Shkodrës, Gjyli shton se ujërat e zeza nuk derdhen më aty dhe ky problem konsiderohet i zgjidhur. Këto ujëra derdhen vetëm në Bunë dhe përveç kësaj ky lumë ka dhe ndotje nga mbeturinat urbane që derdhen në të gjithë gjatësinë e tij.

Në sezonin veror analizat e ujërave të Shkodrës bëhen çdo një javë, ndërsa në pjesën tjetër të vitit ato bëhen një herë në tre muaj, shton shefi i higjienës. Ndotja e lumit Buna nuk është e re, pasi prej vitesh ky lumë ka patur derdhje të ujërave të zeza si dhe hedhje mbeturinash që tashmë janë shtuar. Kjo ka sjellë që edhe pedonalja buzë molos së këtij lumi, e cila frekuentohet mjaft nga qytetarët e Shkodrës të afrojë kushte jo të përshtatshme ajri pasi ai rezulton të jetë i ndotur. Dëmi ekologjik këtu është i dukshëm, pasi kjo pjesë është kthyer në një moçal, ku ujërat e zeza dallohen me sy, ndërsa era e rëndë e shton së tepërmi ndotjen. E si të mos mjaftonte kjo, në këtë pjesë nuk mungojnë as mbeturinat urbane që hidhen aty duke e rritur nivelin e ndotjes. Afrimi i stinës së ngrohtë dhe rritja e temperaturave e bën të padurueshme situatën.

Bypass-i

Mospërfundimi i bypass-it të Shkodrës po prish imazhin e pedonales se Urës se Bunës dhe po i shkakton një dëm ekologjik liqenit të Shkodrës. Hedhja e mbeturinave në afërsi të këtij bypass-i është një problem shqetësues. Një shqetësim të tillë e shfaqin edhe qytetarët e Shkodrës, të cilët, teksa kalojnë në pedonale, përballen me një pamje të shëmtuar të këtij bypass-i që ka mbetur i papërfunduar. Pamja e bypass-it aktualisht ngjason me një shesh ndërtimi të braktisur, ku vendin e makinerive kanë nisur ta zënë mbeturinat që përfundojnë në Liqenin e Shkodrës. Nga dita në ditë, ky bypass vetëm sa po degradohet dhe i vetmi funksion qe po kryen është krijimi i moçaleve dhe grumbullimi i mbeturinave të hedhura nga banorë dhe biznese të zonës.