Aktualitet
Një garniturë zhvillimesh të rëndësishme…
SHBA-BE: Nuk ka kohë më për ndryshime thebësore me reformën
Zëvendësambasadori amerikan tregoi raste konkrete, sesi dy kompani amerikane vendosën të largoheshin nga Shqipëria, kur u përballën me vendime gjyqësore të padrejta. Bashkë me shembujt konkretë ishte edhe llogaria konkrete.
Ambasada amerikane në Tiranë ka menduar të flasë shembuj konkretë për të ndikuar në përshpejtimin e reformës në drejtësi. Janë dy vendime që David Muniz, zv.ambasadori, i solli për të theksuar sesa ndikon korrupsioni i gjykatave. “Vitin e kaluar ne kemi biseduar me disa kompani që do të investonin 250 milionë dollarë, por këto kompani vendosën të investojnë tjetërkund, për shkak të frikës se nuk do të kishin një gjykim të drejtë në gjykatat shqiptare. Parlamenti është në kohën e duhur për ta miratuar refomën. Nëse ka negociata që duhen zhvilluar në mënyrë që drafti përfundimtar të votohet, është shumë vonë që të bëhen ndryshime thelbësore për pjesë të rëndësishme të reformës. Le të ecim përpara dhe t’i japim fund. Nuk ka më kohë për vonesa dhe argumente të pafundme”, tha David Muniz.
Nga ana e vet, ambasadorja e BE-së në Tiranë, Romana Vlahutin, ka shtuar se sado që do të përpiqen, reforma është në rrugë të mbarë dhe në finale ata që nuk e duan atë do të zbulohen. “Ka grupe dhe individë që nuk e duan këtë reformë. Dhe ne e dimë këtë. Ne dimë arsyet dhe frikën e tyre. Ata përpiqen dhe do të përpiqen deri në fund ta shtyjnë reformën, ta ndryshojnë dhe ta pamundësojnë atë. Por nuk ka më kohë për të luajtur kukafshehtas”, tha ajo.
Fusha e minuar e përgjimeve dhe e shkeljes së privatësisë
Pas përballjes me “Apple” për dekodimin e një iPhone, Byroja Federale Amerikane e Hetimit – FBI – përfshihet në një tjetër rast kritik për privatësinë e përdoruesve të internetit. CNN njofton se Byroja i ka kërkuar një prej zhvilluesve të softuerit Tor – që të dalë në gjyq për të dëshmuar në kuadër të një hetimi kriminal për veprimtari hakeruese. Isis Agora Levecruft , emri i personit, është larguar drejt Gjermanisë, menjeherë sapo agjentët federalë kanë trokitur në derën e shtëpisë së saj. “U shqetësova se do të më pyesnin për diçka që dëmton njerëz të pafajshëm dhe më ndalon mua që t’ua bëj me dijë atë që po ndodh”, deklaroi ajo në një intervistë për CNN(http://money.cnn.com/2016/05/17/technology/tor-developer-fbi/index.html?iid=hp-stack-dom).
Nga ana tjetër, agjentë federalë i kanë thënë televizionit amerikan, se personit në fjalë, i është kërkuar që të ndihmojë në një çështje me të cilën, sipas FBI-së, “ajo ka lidhje”. Ndihma që i kërkohet në këtë rast është zbulimi i vendndodhjes së përdoursve të hetuar, të cilën “Tor” e realizon më së miri. Softi është ndër më të përdorurit në botë dhe ka si synim anonimatin online, shmangien e identifikimit të vendndodhjes së përdoruesit, shmangien e analizës së trafikut, pra gjurmimin dhe shërben më tej edhe si instrument për të zhvilluar mjete të reja komunikimi të sigurta.
Në faqen online të “Tor”, thuhet se edhe gazetarët e përdorin atë kur flasin me sinjalizues apo informatorë që kanë gjëra delikate. Është pra një nga garancitë që agjencitë qeveritare të mos fusin hundët në emër të alibisë së përjetshme që quhet: siguria kombëtare.
Kërkesa e FBI-së në këtë rast do të minonte sigurinë edhe të këtij mjeti me një mënyrë që duket se provon se përpjekjet për ta thyer në rrugë informatike kanë dështuar.
Një rast i çarjes së “Tor” është konstatuar në vitin 2012, me një bashkëpunëtor të revistës “Foreign Policy”, një aktivist maroken që propagandon kundër qeverisë së vendit të tij. Në një shkrim të prillit 2016, revista shkruan se thyerja ndodhi përmes një e-maili, i titullluar si dhënie informacioni konfidencial, klikimi i të cilit hapi rrugën e infektimit të kompjuterit me një virus shumë të sofistikuar që zbulonte të gjitha të dhënat. Pas këtij operacioni qëndronte e mirënjohura “Hacking Team” e drejtuar nga italiani, David Vincenzetti, që konsiderohet se ka krijuar një nga kompanitë më të suksesshme të atyre që thirren si “mercenarët e epokës dixhitale”(http://foreignpolicy.com/2016/04/26/fear-this-man-cyber-warfare-hacking-team-david-vincenzetti/).
Për kujtesë “Hacking Team” u përfol edhe në mediat shqiptare para disa muajsh, si një nga kompanitë që do t’i ofronte qeverisë shqiptare mundësi përgjimi, që operojnë në formën e sipërpërmendur(http://shqiptarja.com/news.php?IDNotizia=304448).
Ky sqarim ka rëndësi pasi lidhet me faktin se bota e internetit shtron disa specifika të vetat për privatësinë, të drejtat dhe raportin me ligjin. “Hacking Team” prodhon softe përgjimi dhe kjo nuk ka asgjë të keqe, pasi teorikisht do të jetë gjykata që vendos nëse kjo duhet të bëhet apo jo.
Ky është problem në të gjithë botën. Në rastin e sjellë në fillim të shkrimit, çështja ka shkuar në mbrojtje ligjore, teksa e ëma e Lovecruft iu drejtua një avokati të specializuar për ligjet e survejimit dhe tekonlogjisë. Avokati sugjeroi takim mes klientes dhe agjentëve në prezencë të tij, por agjentët refuzuan duke kërkuar takim direkt.
Sipas Lovecruft ajo që kërkohet, madje në mënyrë agresive, është ndihma për të thyer mbrojtjen e “Tor”, e për të gjetur mandej vendndodhjen e dikujt që FBI e kërkon me ngulm. Por ky do të ishte fundi i programit dhe shkelje privatësie për mijëra prodorues. Nga ana tjetër nuk ka asnjë shkelje ligji nga Lovecruft, por pavarësisht kësaj, FBI, njësoj si në rastin e “Apple” do të marrë atë që kërkon. Këtu jemi ende në fazën e hetimit dhe FBI-ja synon të përmbushë objektivat e vet me mjete jo shumë ortodokse që krijojnë premisa për të hyrë lirisht në zonën e mbrojtur Teknikisht të privatësisë. Pra në vijën e kuqe të të drejtave.
Edhe në një rast të janarit të këtij viti, kur Byroja asgjësoi një rrjet pedofilësh që zinte fill në Hollandë, e bëri këtë jo duke thyer Tor, por duke përgjuar dhe duke kapur administratorin e rrjetit social që ushtronte këtë aktivitet në flagrancë dhe duke arritur të merrte të dhënat për hyrje.
Tor pra mbetet ende në fuqi dhe ky është problemi për agjencitë e ligjit. Duket si një problem shumë teknik, por ka implikime esenciale për të drejtat, gjykimi i të cilave është në tagrin e gjykatës.
Kur këto përballje të acaruara ndodhin në SHBA, është e lehtë të imagjinohet se çfarë aventure e rrezikshme është loja me përgjimet që do të bëjë qeveria shqiptare, e cila së fundmi hodhi idenë e detyrimit të ISP-ve që të japin adresat e përdoruesve. Pa sqaruar se çfarë do të thotë kjo, thjesht me një amendim në ligj dhe në kushtet kur shumica e njerëzve që përdorin internetin në Shqipëri nuk e kanë idenë se kush e ruan privatësinë e tyre. Dhe sesa autoritetet ligjzbatuese janë në gjendje të njohin atë informacion që kërkojnë, ta menaxhojnë atë apo të kuptojnë sesa fushë delikate është kjo.
Vetëm një javë pas inaugurimit nga ministri Ilir Beqaj
Ministri i Shëndetësisë Ilir Beqaj e shpalli si sukses caktimin e një qendre për kryerjen e analizave dhe vizitave në QSUT. Sipas tij, Qendra e Konsultave do të lehtësonte qytetarët dhe do të evitonte radhët e gjata në sportele. Por një javë pas inaugurimit të saj kjo qendër është kthyer në një tmerr për vetë pacientët, por edhe në fole vjedhjesh dhe abuzimesh. Tema Tv ka bërë një vëzhgim në këtë qendër ku ka marrë edhe mendimet e disa qytetarëve.
A po e reduktojnë sipërfaqen e mbrojtur të Parkut të Liqenit?
Gjergj Bojaxhi shkruan sot në “Facebook” për mundësinë e betonizimit të Parkut të Liqenit në Tiranë, përmes një manovre të pisët, që i fsheh qytetarëve të vërtetën. Çdo gjë lidhet me vendimin për t’i kaluar Parkun e Madh të Liqenit Artificial (asetet e ndodhura në të) nga Drejtoria e Përgjithshme nr. 1, në administrimin e Agjensisë së Parqeve dhe Rekreacionit. Por harta mungon. Ndaj Bojaxhi ka bërë këtë investigim: “Në mungesë të një harte nga ana e Këshillit Bashkiak, ne kemi bërë një verifikim të numrave të pronave të bëra publike në komunikimin e vendimit dhe duket qartë se nëpërmjet këtij vendimi, Këshillit Bashkiak i Tiranës po i kalon në administrim Agjensisë së Parqeve dhe Rekreacionit, një sipërfaqe më të vogël sesa sipërfaqja aktuale e Parkut, e miratuar me vendim të KKT. Kjo është pa dyshim një tjetër përpjekje për t’i grabitur parkut copa të tjera trojesh, të cilat me siguri do të jepen për ndërtim. Pronat që mungojnë janë në pjesën juglindore të parkut, në zonën me ndërtime informale, e cila praktikisht po hapet për zhvillime rezidenciale apo kullash, në veri, në zonën poshtë digës, dhe pjesën jugore, në anën e Farkës pranë unazës së madhe”, shkruan Bojaxhi që shton këto pyetje për kryetarin Erjon Veliaj:
“1) Pse APR-së po i kalohet për menaxhim një kufi parku i pa përcaktuar qartë dhe po harrohen shumë prona publike pa u përfshirë në të?
2) Pse nuk miratohet Plani për Parkun i cili të parashikojë zgjerimin e sipërfaqës të parkut dhe pas miratimit të kufijve të zgjeruar të parkut, t’i kalohen APR-së të gjitha sipërfaqet për menaxhim, me klauzolat specifike?”(https://www.facebook.com/Gjergj.Bojaxhi/?fref=ts)
Ky shqetësim mund të marrë përgjigje nëse Bashkia publion hartën, të cilën shpresojmë që të bëhet. Jemi përpara një individi si Erjon Veliaj, që akuzohet se fallsifikon firma, që nxjerr nëpunësit në protestë para gjykatave, që konsulton me militantë partiakë projekte madhore dhe i shet sikur i ka konsultuar me qytetarë dhe që nuk jep përgjigje direkte për ato që pyetet. Janë të gjitha arsyet që të dyshohet se po luhet pisët në këtë zonë, ndoshta me bekimin e PD-së, e cila deri më tani nuk ka dhënë asnjë deklaratë publike se çfarë ka ndërmend për Parkun kur të vijë në pushtet. Kjo e Bojaxhiut është një denoncim personal që merr interes publik, deri kur Bashkia do të sqarojë me dokumente si qëndron e vërteta.
Siguria ushqimore/Bllokohen 3 tonë produkte mishi, sallam “Wudy”
Mbi tre tonë sallam “Wudy AIA” është bllokuar nga drejtoria rajonale Tiranë, e Autoritetit të Kontrollit të Ushqimit në bashkëpunim me Seksionin e Krimit Ekonomik në Drejtorinë e Policisë Tiranë. “Inspektorët e DRAKU Tiranë, kanë bllokuar gjatë një inspektimi më datë 17.05.2016, sasinë prej 3044 kilogram sallam “Wudy AIA” për mungesë gjurmueshmërie edhe dokumentacioni, në subjektin e magazinës frigoriferike “Ismet Darsi” në rrugën Butrinti, në Laknas të Tiranës. Nga inspektimi rezultoi se në këtë subjekt nuk kishte kushte të ruajtjes dhe të tregtimit të produkteve ushqimore, mungesë dokumentacioni të gjurmueshmërisë për produktin sallam “Wudy AIA” dhe dokumentacione gjurmueshmërie për produkte të tjera ushqimore. Si pasojë, u mor masa e bllokimit të sasisë 3.044 kg sallam të llojit “Wudy AIA” dhe gjobë administrative me vlerën e 100.000 lekëve të reja”, njofton AKU.
Së fundmi, kontrollet mbi cilësinë dhe sigurinë e ushqimeve kanë konstatuar jo pak probleme. Sugjerohet që konsumatorët të lexojnë etiketat ku pasqyrohen të dhënat dhe tregëtuesi.
Një tender më shumë…
Sot ministri i Jashtëm Ditmir Bushati njoftoi në konferencën “Investo në Shqipëri: Sfida dhe mundësi”, se “do të ngrihet edhe një sistem informatik, i cili do të krijojë ndërlidhje në kohë reale mes selive tona diplomatike dhe institucioneve qendrore me qëllim dhënien e informacionit sa më të plotë për investitorët e huaj”. Nga ana e vet ministria e Zhvillimit Ekonomik, Milva Ekonomi kërkoi që “diplomatët të kenë më shumë njohuri për marrëveshjet tregtare të Shqipërisë me organizatat ndërkombëtare dhe shtetet e ndryshme”( http://top-channel.tv/lajme/artikull.php?id=327316&ref=ngj).
Parimisht nisma nuk ka pse të kritikohet, e as të shihet me dyshim. Por është praktika e funksionimit të gjërave që të bën të dyshosh se ky është shoë i radhës.
Së pari, Ministria e Jashtme e ka krejtësisht të pamundur që të thithë investitorë serioze nga jashtë, sa kohë që selitë kryesore diplomatike në Tiranë, njoftojnë largimin e investiroëve të tanishëm. Rasti i fundit është i sotmi, kur zv.ambasadori amerikan, Muniz, deklaroi largimin e dy investitorëve pasi u penalizuan sipas tyre padrejtësisht nga gjykatat.
Së dyti është imazhi i Shqipërisë, për të cilin qeveria dhe Ministria e Jashtme, ose nuk po bëjnë asgjë, ose asgjë nuk perceptohet. Po të heqim shkrime 300 mijë euro, si ai në rubrikat me pagesë të “The Economist”, asgjë reale nuk duket se është bërë për të eliminuar imazhin negativ të Shqipërisë. Intervista e fundit e kryeministrit Edi Rama për “Euroneës” e risolli në vëmendje këtë gjë, sikurse deklarimet e ministres së Mbrojtjes së Britaninë e Madhe. Dhe po flasim për kritika asgjësuese për zbatimin e ligjit dhe funksionimin e shtetit. Qeveria aktuale miratoi madje ligjin për investimet strategjke, përmes të cilit ofronte lehtësi të mëdha, madje kontrata qiraje 1 euro për investime mbi 50 milionë euro, por asgjë nuk ndryshoi.
Shpesh janë bërë kritika të forta, sidomos nga ambasada dhe biznesi gjerman, për ndryshim të stafeve që menaxhojnë marrëdhëniet me investitorë të huaj, çka ul besueshmërinë.
Së treti është situata e pronësisë në Shqipëri. Dy lajme të ditëve të fundit, anullimi Parkut Industrial në Lezhë dhe reduktimi në 100 ha, i Zonës Ekonomikë të Spitallës, flasin për probleme serioze pronësie në Shqipëri. Sado që të propagandojë qeveria se brenda 10 viteve do të zgjidhë problemin e pronës, kjo është larg realitetit. Cili investitor serioz do të mendonte të hidhte para në një vend me pasiguri të tilla?!
Pa harruar këtu se qeveria, me ligjin për investimet strategjike, i jep të drejtën vetes të shpronësojë për të mundësuar investimet që klasifikohen strategjike, por që në thelb mbeten interesa private.
Së fundmi, është kapaciteti dhe serioziteti i rrjetit diplomatik shqiptar. Kushdo mund të provojë vetë që të kërkojë të aplikojë për një pasaportë në selitë diplomatike apo konsullore shqiptare. Le të provojë kush ka dëshirë ta zëmë Konusllatën e Milanos dhe të gjykojë se me çfarë ka të bëjë. Po flasim për një shërbim bazik, themelor, Pasaportën, për ofrimin e së cilës, shteti shqiptar operon me dy sportele, pra dy çmime: një për qytetarët rezidentë dhe një për emigrantët.
Problemet kryesore që ka vendi, që janë edhe të trashëguara, rëndohen nga problemet themelore organizative të këtij ekipi që qeveris Shqipërinë dhe nga vullneti apo energjia e tij për të ndryshuar diçka. Të flasësh sot për një sistem informatik mes selive diplomatike, kur realiteti manifeston krizë reale dhe të thellë, është as më shumë e as më pak: dekor, grim, teatër politik dhe sidomos, Një Tender më shumë. Gjithësesi, urojmë që kjo nismë të japë efekt. Fundja do ishte mirë për të gjithë.
Mali i Zi në NATO, në Rusi flasin për asgjësim të çdo neutraliteti. Paralajmërohen turbullira politike në rajon
Anëtarësimi i Malit të Zi në NATo nuk është pritur mirë në Rusi. Moska zyrtare ka kundërshtuar përherë politikën e zgjerimit, që Aleanca e Atlantikut të Veriut ka ndjekur, gjithnjë me arsyetimin se zgjerimi në kushtet e një asimetrie konvencionale në kërcënime, nuk justifikohet. Shkrirja e Traktatit të Varshavës do të duhet të prodhonte këtë balancë dhe frenim, por ai prodhoi të kundërtën: Perëndimi plotësoi boshllëkun. Bashkë me vendosjen e sistemeve mbrojtëse në Rumani, Poloni si dhe ngritjen e forcave të reagimit të shpejtë, ideja e një konflikti mes Rusisë dhe Perëndimit është reale.
Mali i Zi vjen si akt i fundit “dorëzimi” i neutralitetit në kuadër të një rajoni që po ngjyroset përherë e më shumë me flamurin e NATO-s. Çfarë mund të bëjë Rusia dhe sa e kërcënon reagimi i saj stabilitetin e Ballkanit?
Është herët për të folur, por zëra nga Moska kanë nisur të paralajmërojnë. Në një shkrim, publikuar në “Russia-Direct”, një faqe analizash e financuar nga “Rossiyskaya Gazeta”, gazeta zyrtare e qeverisë ruse, paralajmërohen aksione me natyrë politike, që mund të sjellin trazime.
Autori i shkrimit, Matvey Lomonosov, shkruan se hapat që po hidhen në drejtim të Europës Lindore nga Perëndimi, po konstitutojnë një RealPolitik, çka e lehtëson aktivitetin dhe kundërbalancimin rus. Sipas tij, NATO ka shkelur, me anëtarësimin e Malit të Zi, parimet e demokracisë që pretendon se i promovon, pasi aleanca ka shpërfillur ndarjen e madhe që ekziston në këtë vend lidhur me rreshtimin ushtarak. “Pranimi i Malit të Zi në NATO tregon se nuk ka konesnsus mbi anëtarësinë në Aleancë. Çështja ka krijuar tashmë një krizë të brendshme politike. Shumë sondazhe tregojnë se jo më pak se 40% e Parlamentit e kundërshton vendimin për t’iu bashkuar NATO-s. Një lëvizje e tillë rrezikon procesin demokratik dhe pengon konsolidimin politik”, shkruan autori. Si përgjigje eventuale për këto që po ndodhin është përfshirja e Rusisë në politikat e brendshme të vendeve të cilat nuk kanë unanimitet në pjesëmarrjen në NATO, duke ndikuar te partitë apo grupet që janë kundër anëtarësimit, duke dhënë mbështetje për ta.
Së dyti, sanksionet ruse ndaj Malit të Zi mund të bëhen realitet. Procesi i paqes në Ukrainë mund të bëhet më i vështirë. Të gjitha pra hapësira ku Rusia do të përpiqet, apo mund të përpiqet ta bëjë shumë të kushtueshme këtë lëvizje, e cila homogjenizon hartën nga Atlantiku deri në Detin e Zi. “Qeveria ruse nuk e ka kundërshtuar pranimin në NATO të atyre vendeve ku opinioni publik dhe vizioni politik ka qenë unanim, konkretisht Shqipëria dhe Kroacia. Gjithësesi ajo është përpjekur të shpëtojë një “zonë neutraliteti”, shtete me ndasi të brendshme, si Mali i Zi, Bosnje-Heregovina dhe Ukraina, duke vënë theksin te nevoja për të respektuar procesin demokratik lokal dhe ndarjet politike”, shton autori(http://www.russia-direct.org/opinion/if-montenegro-joins-nato-get-ready-…).
Mbetet për t’u parë se çfarë do të ndodhë, por fakt është se akti me vendin tonë fqinj nuk duket se do të kalojë lehtë.
SHBA-BE: Nuk ka kohë më për ndryshime thebësore me reformën
Zëvendësambasadori amerikan tregoi raste konkrete, sesi dy kompani amerikane vendosën të largoheshin nga Shqipëria, kur u përballën me vendime gjyqësore të padrejta. Bashkë me shembujt konkretë ishte edhe llogaria konkrete.
Ambasada amerikane në Tiranë ka menduar të flasë shembuj konkretë për të ndikuar në përshpejtimin e reformës në drejtësi. Janë dy vendime që David Muniz, zv.ambasadori, i solli për të theksuar sesa ndikon korrupsioni i gjykatave. “Vitin e kaluar ne kemi biseduar me disa kompani që do të investonin 250 milionë dollarë, por këto kompani vendosën të investojnë tjetërkund, për shkak të frikës se nuk do të kishin një gjykim të drejtë në gjykatat shqiptare. Parlamenti është në kohën e duhur për ta miratuar refomën. Nëse ka negociata që duhen zhvilluar në mënyrë që drafti përfundimtar të votohet, është shumë vonë që të bëhen ndryshime thelbësore për pjesë të rëndësishme të reformës. Le të ecim përpara dhe t’i japim fund. Nuk ka më kohë për vonesa dhe argumente të pafundme”, tha David Muniz.
Nga ana e vet, ambasadorja e BE-së në Tiranë, Romana Vlahutin, ka shtuar se sado që do të përpiqen, reforma është në rrugë të mbarë dhe në finale ata që nuk e duan atë do të zbulohen. “Ka grupe dhe individë që nuk e duan këtë reformë. Dhe ne e dimë këtë. Ne dimë arsyet dhe frikën e tyre. Ata përpiqen dhe do të përpiqen deri në fund ta shtyjnë reformën, ta ndryshojnë dhe ta pamundësojnë atë. Por nuk ka më kohë për të luajtur kukafshehtas”, tha ajo./Respublica
Duhet të jeni i kyçur në mënyrë që të mund të lini një koment Kyçu