Karburantet kanë pësuar një rritje të ndjeshme të çmimeve në treg. Nafta është lënda që ka prekur më shumë qytetarët, e cila aktualisht po tregtohet në treg afërsisht në nivelin 200 lekë/L.

Transporti është sektori i parë që prek rritja e çmimit të karburanteve, dhe një rritje e mundshme e çmimit të biletave, përkthehet në kosto shtesë për xhepin e qytetarëve.

Kreu i Shoqatës së Transportit Urban dhe Interurban, Dashnor Memaj në intervistë për A2 CNN, ka paralajmëruar rritje të çmimit të biletës për transportin, pikërisht për shkak të rritjes së çmimit për naftën.

Memaj u shpreh se prej dy vitesh çmimi i karburanteve është në rritje dhe se qeveria nuk i ka dhënë asnjë mbështetje ekonomike.

“Në këtë fazë që jemi nafta ka shkuar rreth 20 lekë për litër. Që do të thotë është tmerruese dhe shqetësuese shumë e madhe. Nuk kemi pasur një suport ekonomik nga shteti, e të diskutojmë se si do të mbijetojmë në treg. Natyrisht në fund të ditës është konsumatori që përballet me çmimin e rritur. Por ne e kemi lëndë kryesore dhe rritja e pandërprerë dhe e vazhdueshme ndikon drejtpërdrejt te ne”, tha kreu i shoqatës.

Ministrja e Ekonomisë dhe Financave, Delina Ibrahimaj, e pyetur për situatën me çmimet e karburanteve, u shpreh se rritja do të vijojë edhe për 6 muaj duke theksuar se shteti e ka të pamundur të ndërhyjë me praktika stabilizuese.

Edhe vetë kryeministri Rama tha se rritja e çmimeve po ndodh kudo, ndërsa shton se bashkë me rritjen e tyre janë rritur edhe rrogat e shqiptarëve.