Treguesit që lidhen me inovacionin kanë ardhur, duke u përkeqësuar në Shqipëri. Kujtojmë që vlerësimin më të lartë, Shqipëria e ka marrë në vitin 2011, më pas renditja ka ardhur në rënie.

Në raportin e fundit të publikuar mbi Indeksin e Inovacionit Global 2021, vendi ynë renditet i 130, nga 132 shtete në total. Ndërsa në 2011-ën renditej e 80-ta.

Nëse e krahasojmë me fqinjët dhe vendet e Ballkanit Perëndimor, vendi ynë rezulton me vlerësim si më i prapambeturi. Disa nisma të qeverisë për mbështetje dhe lehtësira për bizneset e reja në Inovacion e Teknologji Informacioni, nuk janë vlerësuar me impakt.

Po njësoj, rezultate duket se nuk ka patur dukshëm as nga disa programe të mbështetura nga Buxheti i Shtetit për rritje të logjistikës dhe kapaciteteve të administratës.

Import-eksportet në Teknologji Inovative dhe Shërbime Produkt, tregojnë se sa angazhim dhe rezultat ka një vend për fuqizim të sektorit. Në renditje, Shqipëria është në pozicionin më inferior, jo vetëm me fqinjët e rajonit, por edhe në rang global.

Shqipëria në kuadrin e eksporteve të teknologjisë, renditet në vendin 130, ndërkohë që vendet si Bosnia-Herzegovina renditet në vendin 51, Mali i Zi në vendin e 113, Maqedonia 50 dhe Serbia 64.

Duket se Shqipërisë do i duhen shumë vite që vendi të arrijë vendet e rajonit. Inovacioni është një sektor që ndikon gjerësisht ekonominë, shërbimet, biznesin dhe të gjithë sektorët e tjerë të ekonomisë.

Burimi: Open Data Albania