Neritan Sejamini në TPZ

Neritan Sejamini, ka folur për shpalljen non-grata të Sali Berishës nga DASH. 

I ftuar në emisionin “Të Paekspozuarit” në MCN TV, Sejamini tha se vendimi i DASH ishte politik, por sot, pas një viti, ky vendim ka dështuar dhe nuk ka përmbushur qëllimet që kishte DASH, të cilat sipas Sejaminit ishin inkurajimi i drejtësisë dhe çlirimi i opozitës nga Berisha. 

“Vendimi i DASH është vendim politik. Ndërmerret për të zbatuar politikën e jashtme të SHBA. Nuk është vendim drejtësie. Nëse Sekretari i Shtetit bie ndesh me një informacion, që një zyrtar është i korruptuar, mund t’i ndalojë hyrjen. Është mjet i DASH, që nuk jep viza. 

Në rastin e zotit Berisha, ka patur qëllim politik, për të ndihmuar drejtësinë për t’i dhënë kurajo dhe për të forcuar opozitën, me idenë që zoti Berisha mban peng opozitën. Këto dështuan, sepse politikisht ndodhi krejt e kundërta. Drejtësia shqiptare nuk ka bërë asgjë fare. Sot i vetmi person i dënuar është kryetari i Bashkisë së Lushnjes, i akuzuar indirekt për shpërdorim detyre. Drejtësia ka prodhuar vetëm ish kryetarin e Bashkisë Lushnje. Tahiri është hetuar nga drejtësia e vjetër.

Pastaj, që reforma është madhështore, do të japë rezultate spektakolare…

Kjo histori është e marrë fund. Dështimi i qeverisë është ky, erdhi në pushtet për të luftuar korrupsionin e Berishës dhe nuk bëri asgjë.

Gjithë qeverisë Berisha i ka mbetur edhe pak muaj që mund të hetohen, sepse është parashkrimi. Edhe po të duan nuk i hetojnë dot më. Këta kanë përdorur vetëm fjalë. Në politikë, këta bëjnë shfaqje me drejtësinë”, tha ndër të tjera Sejamini.