Ushtarë të vetmuar të “Ballkanit të Hapur”. Kështu i quan media fraceze “Courrier des Balkans”, Edi Ramën dhe Aleksandër Vuçiç, në një shkrim kushtuar kësaj nisme.

Në artikull evidentohet se refuzimi i kësaj nisme nga Kosova, Mali i Zi dhe Bosnja, të cilat janë shprehur se “Ballkani i Hapur” nuk shkon paralaelisht me interesat e tyre europiane.

Së fundmi kemi dëgjuar thirrjet e Ramës për kryeministrin e ri shqiptar të Malit të Zi, Dritan Abazoviç që t’i bashkohet nismës. Por edhe pse ai u shpreh pro kësaj nisme, nuk dihet nëse Abazoviç do të guxojë të krijojë përplasje për këtë çështje.

Kjo sepse qeveria e tij varet nga mbështetja e partisë së presidentit Gjukanoviç, i cili e ka refuzuar në mënyrë kategorike nismën.

Në artikullin e shkruar nga gazetari Rico Simon, theksohet se “Edi Rama është bërë vitet e fundit aleati më i zellshëm i Aleksandër Vuçiçit në Ballkan”.

Më tej shton se duke ditur pamundësitë që kjo nismë të përparojë, Vuçiç ka kërkuar mbështetje nga ana e Shteteve të Bashkuara. 

“Kapja pas ‘Open Balkan’ i lejon atij përdorimin e kartës së e garantuesit të stabilitetit rajonal dhe perspektivës të integrimit evropian. Nuk dihet sa kanë mundur të bindin këto argumenta sidomos kur muajt e fundit i dërguari special amerikan, Gabriel Escobar ka insistuar në faktin se çdo nisëm mund të ketë sukses vetëm nëse bashkon të gjashta vendet e Ballkanit Perëndimor”, thuhet më tej.

Në takimet e fundit të zhvilluar me ndërkombëtarët, Rama i kushton një pjesë të mirë të konferenace nismës “Ballkani i Hapur”, duke i mëshuar faktit se ka marrë mbështetje. Por ka edhe një “kusht”, pasi të huajt kërkojnë gjithëpërfshirje.