Arrestohet rivali kryesor i Erdogan, lëshohen 100 urdhër arreste për bashkëpunëtorët e tij; në pranga gazetarë e biznesmenë

Në një video të postuar nga Imamoglu nga shtëpia e tij, kryebashkiaku i Stambollit shprehet se po përgatitet për arrestimin e tij dhe deklaron se nuk do të dorëzohet dhe do të vazhdojë luftën kundër Erdoganit.

Zhvillime dramatike ka ndodhur mëngjesin e sotëm në Turqi, pasi një operacion i madh policor është kryer herët në mëngjes për të arrestuar Ekrem Imamoglun pas një hetimi për ngjarjet në bashkinë e Stambollit. Sipas mediave turke operacioni që përfshin 3,000 oficerë policie ka vënë në pranga 100 persona që janë bashkëpunëtorë të kryebashkiakut të Stambollit.

Kryetari i bashkisë së Stambollit, Ekrem Imamoglu është arrestuar për korrupsion, raporton Bloomberg.

Sipas informacioneve, janë lëshuar urdhra paraburgimi ndaj qindra personave të tjerë, përfshirë gazetarë dhe biznesmenë. Akuzat variojnë nga korrupsioni te terrorizmi.

Në një video të postuar në X, Imamoglu tha se qindra oficerë policie u shfaqën në shtëpinë e tij.

“Më vjen keq të them se një grusht mendjesh po përpiqen të uzurpojnë vullnetin e kombit tonë. Policët e mi të dashur, forcat e sigurisë së vendit po ju përdorin si instrumente të së keqes. Kjo është tirani. Por dua ta dini se nuk do të dorëzohem. Ju dua shumë të gjithëve, mbështetem te kombi. Le ta dijë i gjithë kombi im se nuk do të përkulem.”, ka shkruar 53-vjeçari.

Ekrem Imamoglu mori drejtimin e bashkisë së Stambollit në vitin 2019, kur ai rrëmbeu metropolin në Bosfor nga AKP pas 20 vitesh në pushtet, duke fituar edhe pas rinumërimit të kërkuar në atë kohë nga mbështetësit e Erdoganit. Një vit më parë, ai fitoi për herë të dytë duke konkurruar i vetëm kundër kandidatit të AKP-së.

Fitoret që e kanë bërë atë ndër kandidatët më të besueshëm për të sfiduar dominimin e Presidentit Rexhep Erdogan, dhe një nga armiqtë e tij kryesorë.

Sipas një deklarate të prokurorisë së Stambollit për hetimin e parë, gjithsej 100 persona, përfshirë gazetarë dhe biznesmenë, dyshohet se janë të përfshirë në aktivitete kriminale në lidhje me tenderat e caktuar të dhënë nga bashkia. Në hetimin e dytë përfshihet Imamoglu dhe gjashtë të tjerë për ndihmë ndaj Partisë së Punëtorëve të Kurdistanit (PKK), e cila konsiderohet një organizatë terroriste nga Turqia dhe aleatët e saj perëndimorë.

Ndalimi erdhi një ditë pasi Universiteti i Stambollit anuloi diplomën e Imamoglut, me pretendimin se është false. Sipas universitetit, diploma përmban “gabime të dukshme”. Diploma nga Universiteti Amerikan Girne (GAU) në Qipron Veriore e lejoi atë të regjistrohej në Universitetin e Stambollit në vitin 1990, por që mund të mos konsiderohet e vlefshme në Turqi.  

Marrja e diplomës universitare është një nga kërkesat për të kandiduar për president të Republikës  dhe Imamoglu kishte shpallur tashmë synimin e tij për të marrë pjesë në zgjedhjet e ardhshme. 

Kryebashkiaku i Stambollit e quajti të paligjshëm vendimin e universitetit, duke argumentuar se bordi drejtues nuk kishte të drejtë të anulonte diplomën dhe një vendim i tillë i takonte vetëm  “Bordit të Drejtorëve të Administrimit të Biznesit”, fakultetit ku ai studionte.

“Po afrojnë ditët kur ata që morën këtë vendim do të mbajnë përgjegjësi përpara historisë dhe drejtësisë. Marshi i kombit tonë, i etur për drejtësi, ligj dhe demokraci, nuk mund të ndalet”, shkroi Imamoglu në një mesazh në X pak orë përpara se policia të bastiste shtëpinë e tij.