Rama falenderon dhe fton Fatos Nanon, por Ruçi është i pari

Kryeministri Edi Rama e nisi fjalimin e tij në Kongresin e Partisë Socialiste duke prekur aty ku është plaga: tek mundësia që Kongresi të provokojë debat e ndarje.

Ai siguroi se diçka e tillë nuk do të ndodhë.

Fjala e kryesocialistit Rama në Kongres nisi me një perifrazim të shkurtër për pritshmëritë e “grupit Blushi”.

“Ka një pakicë shumë të vogël këtu, që nga ky Kongres pret të gjejë sesi do t’i bëhet hallit statutor të mandatit tim dhe sipas tyre, unë këtu sot jam i pamandatuar”, tha Rama, duke shtuar se kjo do të diskutohet më gjerë në pjesën e tretë të Kongresit.

Kryeministri foli edhe për kundërshtarët jashtë partisë dhe pritshmëritë e tyre për rezultatet e këtij Kongresi, duke ironizuar me “gotën e ujit”.

“Jashtë kësaj shtëpie ka plot forca me njerëz që presin me interes të madh çdo të ndodhë në këtë Kongres. Shumë urojnë që të na ndodhë ndonjë gjë e ‘ububushme’, qoftë të na përmbyset ndonjë gotë ujë, pastaj të bëjnë lajm që anija jonë u përmbyt. Por do të zhgënjehen. Nga ky Kongres do të dalim më të fortë dhe të karikuar, më të motivuar për të çuar reformat në drejtimin e duhur”, deklaroi ai

Më pas, ai nisi një seri me falenderime, duke përmendur të parin, Gramoz Ruçin.

Rama tha se Ruçi e ka këshilluar të mos përmendë emra kur bën falenderime, pasi u ngel hatri të tjerëve.

Megjithatë, Rama e nisi me falenderime dhe i pari ishte Ruçi, për të cilin kishte kaq shumë lavdërime për rolin që ka luajtur në PS.

Më pas, një falenderim dhe ftesë për Fatos Nanon.

“Një falenderim për paraardhësin tim, liderin e parë të kësaj partie, Fatos Nano. Dëshiroj të na bashkohet në 25-vjetorin e kësaj partie dhe të gjejë deri atë ditë fjalët e duhura për kontributin e tij në forcimin e karakterit demokratik të PS.

Çfarë na ka ndarë me të, nuk e ndan në dysh historinë e kësaj partie dhe nuk e bën më pak të rëndësishëm Fatos Nanon me dritëhijet e tij,” tha Rama.