Opozita nuk ‘zbutet’ nga ditëlindja e Metës

Opozita bllokoi foltoren e Kuvendit sot, në përpjekje për të bllokuar zhvillimin e një seance normale.

opozita këmbëngul në dërgimin në Gjykatën Kushtetuese edhe të dy deputetëve të tjera, Rakip Suli dhe Valentina Leskaj.

“Të zbatohet menjëherë vendimi për Gjykatën Kushtetuese të dy deputetët, zoti Suli që e ka kërkuar vetë, dhe zonja Leskaj. Çuat Koçon, çoni dhe dy të tjetrët t’i vendosë gjykata. Nëse Gjykata i nxjerr të pafajshëm, i kërkojmë falje, por tua fshehim deputetët me forcën e kartonit është grusht shteti dhe në këtë formë ky Parlament nuk vazhdon punën e vet”, deklaroi deputeti Eduard Halimi.

Kuvendi më pas vijoi me rendin e ditës, në diskutimin e projektligjit për pajisjet nën presion, ndërsa opozita vijoi t’u bjerë tavolinave duke kërkuar mosvazhdimin e seancës deri në plotësimin e kushteve që kërkojnë.

Deputetët janë detyruar të flasin nga vendi, ndërsa opozita nuk u ‘zbut’ edhe kur mazhoranca i uroi ditëlindjen kreut të Kuvendit, Ilir Meta, duke theksuar se edhe PD duhet ta përshëndesë pasi e kanë pasur në koalicion.

Kjo shkaktoi të qeshura tek Ilir Meta, që mbush 47 vjeç.

I pari që uron zotin Meta ishte deputeti socialist, Bujar Çela.

“Më lejoni për procedurë të uroj ditëlindjen e zotit Ilir Meta, si pjesëtar i të dy koalicioneve dhe i të gjithë sallës”.

Urimi u shoqërua me duartrokitje nga mazhoranca, ndërsa opozita e kaloi në heshtje teksa ishte mbledhur rreth foltores.

“Mendoj se krahu tjetër i kësaj salle mund ta respektojë duke duartrokitur të gjithë. Nuk është faji im që ju si opozitë jini indiferente. E keni për detyrë se keni bashëqeverisur”.

Ndërkohë, meqë ishte dita e urimeve, deputetja socialiste, Arta Dade, rezervoi një urim për ditëlindjen e ministrit të Jashtëm, Ditmir Bushati.

Dade është një nga kritiket më të zëshme të Bushatit brenda mazhorancës.

Pavarësisht tensioneve, seanca i mbylli punimet pa probleme.

Edhe votimet e projektligjeve në rendin e ditës  u bënë teksa opozita mbajti të bllokuar foltoren.

Opozita nuk mori pjesë në votim