“Fakti se terroristët po shkojnë në Europë, është pjesë e një politike turke,”

Përpara se të zhvillohej Kongresi i Partisë Socialiste, kryeministri Edi Rama vizitoi Jordaninë.

Pak informacion u dha për këtë vizitë.

“Dje në Jordani me Mbretin Abdullah II dhe liderë të tjerë nga rajoni, si edhe përfaqësues nga BE, SHBA, NATO e institucione të tjera ndërkombëtare, për të forcuar ndërveprimin në fushën e sigurisë e të luftës shumëplanëshe kundër ekstremizmit,” shkroi Edi Rama në FB.

Por të premten, një portal i njohur për lajmet nga Lindja e Mesme, jep disa të dhëna interesante.

Gazetari David Hearst i Middle East Eye shkruan se Mbreti Abdullah iu është ankuar disa zyrtarëve të lartë amerikanë se Turqia po eksporton terroristë në Europë.

“Fakti se terroristët po shkojnë në Europë, është pjesë e një politike turke,” tha ai.

I pyetur nga një kongresmen amerikan, nëse ISIS po eksporton naftë në Turqi, Abdullah u përgjigj: “Absolutisht”.

Abdullah tha se presidenti turk, Erdogan beson në një zgjidhje radikale islamike në rajon.

“Mbreti i ftoi politikanët amerikanë që të pyesin drejtuesit e Kosovës dhe Shqipërisë në lidhje me turqit. Abdullah tha se këto dy vende po i luten Europës që t’i bëjë pjesë të saj, përpara se ta bënte Erdogani”, shkruan gazetari.

“Abdullah u mbështet në fjalën e tij nga ministri i tij i Jashtëm, Nasser Judeh, që tha se kryeministri shqiptar është një katolik i martuar me një myslimane, dhe është një model që duhet mbrojtur në një vend me shumicë myslimane”.