Këshilltarja, tarracat e gjelbërta reduktojnë përmbytjet

Disa vazo me lule mbi tarracë, disa stola, dy tapete me bar dhe sipas bashkisë së Tiranës, kemi gati një “mushkëri” për qytetin. Madje këshilltarja e Erjon Velisë, Nevin Bilali shkon më tej kur tregon të mirat e projektit të lulishtes në tarracën e bashkisë. Lulishte si këto, të sajuara mbi godina mund të ndihmojnë edhe për përmbytjet në kryeqytet. Deklarata u bë gjatë një interviste për Report Tv. Këshilltarja e Veliajt tregoi se një taracë tjetër do të bëhet me lule dhe stola, diku tek 21 Dhjetori.

“Tarraca e gjelbër redukton derdhjet e ujit të shirave në trotuare dhe nëpër rrugë, ç’ka do të thotë që është një mënyrë shumë e mirë për të reduktuar këtë sasi të ujit që derdhet nëpër rrugë në sasi të mëdha dhe në mënyrë të tillë mund të reduktojmë edhe pak përmbytjet” ka thënë Nevin Bilali.

Projekte si ky i tarracave të gjelbërta promovohen nga Erjon Veliaj në një kohë kur tonelata me zhavorr po hidhen në ndërtimin tek Parku i Liqenit. Policia bashkiake vazhdon i ruan betonieret 24 orë në 24. Qytetarët që protestojnë janë rrahur disa herë si nga policia, ashtu dhe nga pronarët e kompanive private. Në këtë situatë, Erjon Veliaj shpiku “tarracat e gjelbërta”, që tani do na shpëtokan edhe nga përmbytjet.