Dyshime për njoftim përpara arrestimit

Emiljano Shullazi ishte njoftuar se do të shoqërohej nga policia dhe po priste i qetë uniformat blu në një lokal tek rruga e Kavajës. Nuk dihet se nga kush ishte lajmëruar për gjithçka sa po ndodhte dhe priste të shkonte ta merrte policia, e cila do ta shoqëronte në Drejtorinë e Policisë mbrëmjen e së shtunës.

Portali Syri.net shkruan se një fakt tjetër kompromentues është se gjatë momentit të shoqërimit, Emiljano Shullazi nuk e kishte me vete celularin. Me të mbërritur policia në lokalin ku po qëndronte, Shullazi shkoi i qetë në polici me shpresën se do të lirohej sërish pasi do të kundërshtonte akuzat dhe ndaj tij nuk kishte asnjë provë.

Por, në këtë moment ka hyrë në lojë Prokuroria e Krimeve të Rënda, e cila pak pas mesnate preu fletën e arrestit ndaj tij, duke i listuar një sërë akuzash për të dhe dy bashkëpunëtorët Gilmando Dani dhe Blerim Shullazi, që nga grup i strukturuar kriminal e deri tek shkatërrim prone me tritol dhe gjobvënie ndaj biznesmenëve të ndryshëm.

Gjatë disa muajve, Prokuroria kishte kryer hetime ndaj Emiljano Shullazit pa njoftuar policinë dhe në momentin që 38-vjeçari ndodhej i shoqëruar në Drejtorinë e Policisë së Tiranës, njoftoi uniformat blu ta mbanin të arrestuar, pasi akuzohej për vepra të tjera kriminale të bazuara në prova dhe dëshmi. Enigmë mbetet fakti se kush e lajmëroi Shullazin se do të shoqërohej pas denoncimit publik të ish-Kryeministrit Sali Berisha./SYRI