Policia heziton të arrestojë Balilin. CNN Greek: Ka lidhje të forta politike, nuk guxojnë ta prekin

Shteti shqiptar është nën akuzë se po i ofron mbrojtje politike Drejtorit të Transportit Rrugor të Sarandës, Klemend Balili, i akuzuar dhe shpallur në kërkim nga policia greke si një prej organizatorëve të trafikut ndërkombëtar të drogës. Të paktën kështu thotë rrjeti prestigjoz CNN në seksionin grek, në lajmin me titull: “Mbrojtje politike për baronin e kartelit të Ballkanit”, ku i referohet një takimi dypalësh mes policisë greke dhe asaj shqiptare. Përfaqësuesit e policisë shqiptare, siç raporton CNN janë dorëzuar duke thënë se “në Shqipëri nuk mund ta prekim sepse ky person ka lidhje me parti politike dhe kontakte me politikanë të nivelit të lartë”.

Rrjeti investigativ BIRN ka publikuar edhe dokumentin e policisë greke ku Balili përmendet nominalisht si organizator i trafikut dhe furnizuesi me kanabis i organizatës kriminale. Të akuzuar për shkelje të ligjit N433/13 për “lëndët narkotike” , ligjit 187 të kodit penal të “Organizatave Kriminale” dhe të nenit 8 Kod Penal “Krimet e kryera në shtetin fqinj” janë tre persona, ndër ta dhe Klement Balili i Sabaudinit dhe Nazes lindur në 20/03/72 në Shqipëri dhe banues në Sarandë për shkeljet e mësipërme”, shkruhet në dokumentet e policisë greke. Policia greke doli një ditë më larë në konferencë për shtyp ku bëri të ditura detajet e operacionit me 15 të arrestuar dhe sqaroi se hetimi ishte kryer në bashkëpunim të gushtë me DEA-n amerikane.

Policia shqiptare heshti edhe disa orë pas deklaratës së Partisë Demokratike se i shpalluri në kërkim ishte Klemend Balili. E detyruar nga rrethanat e krijuara policia doli me një reagim ku merret me Partinë Demokratike dhe nuk sqaron pozicionin e saj në lidhje me personin e akuzuar.

“Për shkak se operacioni është ende në zhvillim, nuk mund të bëhen publike detaje që cënojnë këtë hetim. Ndërkohë, Policia e Shtetit shpreh indinjatën e saj rreth akuzave tërësisht abuzive nga Partia Demokratike. Suksesi i Policisë në bashkëpunim me partnerët ndërkombëtarë, është një motiv i mirë për të ndalur shpifjet e pabaza.”- thuhet në njoftim. Por si është e mundur që policia greke ka arrestuar 15 persona dhe përmend Shqipërinë si bazë të trafikut, ndërsa policia shqiptare nuk ka njoftuar për asnjë të ndaluar, duke u mjaftuar me frazën se operacionin është në vijim e sipër.Edhe ministri që flet lart e poshtë për çdo çështje, ka kritikuar politikisht opozitën, duke mos thënë asnjë fjalë për personin e akuzuar që është drejtor i administratës publike.

Në operacione të ngjashme, madje të pak javëve më parë, policia shqiptare doli në konferencë me homologët italianë për goditjen e një rrjeti trafiku, ndërsa në rastin konkret policia bën shurdhin dhe memecin. Dhe dikush lart tyre u ka mbyllur gojën. Miqtë e Balilit siç raportojnë mediat janë të shumtë në politikë, me më kryesorin Ilir Metën, i pranishën në inagurimin e hotel “Santa Quaranta” në bashkëpronësi të vëllezërve Balili./Respublica