Lapsi i del në mbrojtje Blushit

Artur Zheji ka sulmuar për të dytën herë brenda pak ditëve Ben Blushin.

Sipas Zhejit, ky i fundit ka ndaluar kritikat ndaj Ramës, pasi i është premtuar një post i rëndësishëm.

Zheji nuk ka asnjë fakt, por thjesht aludon.

Atij ndërkohë i është përgjigjur portal Lapsi.al, i njohur për mbështetjen që i jep Blushit.

Sipas këtij portali, Zheji po e sulmon Blushin sepse në fakt refuzoi planin e Metës dhe Berishës për qeveri teknike.

Ja çfarë shkruan Lapsi:

“Artur Zheji nuk ndalet së sulmuari ata që (rastësisht) prishin planet e Ilir Metës. Për herë të tretë, target i sulmeve të tij është bërë kundërshtari i Ramës në PS, Ben Blushi. Zheji ka aluduar së fundi se kryeministri bleu pas konfliktit për reformën në drejtësi heshtjen e Ben Blushit.

“…në mënyrë magjike dhe të pakuptueshme, ai vuri në “gjumë” dhe “bleu” heshtjen e të “rrebeluarit elokuent” Ben Blushi. Se si ndodhi, e se si nuk ndodhi, askush nuk e thotë dot qartazi, por ndonjë postier enigmatik do të ketë hedhur në kutinë e postës të Ben Blushit, letrën me “recetën” dhe “formulën” çudibërëse shkruan Artur Zheji.

Aludimi është i pështirë dhe pervers dhe vjen nga një mendësi që arenën e politikës e sheh si një ruletë, që një ditë të sjell para duarve të tua zarfin, recetën apo formulën që ke ëndërruar.

Këtë aludon Zheji, i cili për interesin e momentit nuk bën asnjë llogari të thjeshtë: Po sikur të mbarojë vera dhe Blushi të shfaqet në tribunën e parmamentit sërish po aq i egër dhe i ashpër me Ramën? Po sikur ai të vazhdojë serinë e shkrimeve fshikulluese për rilindjen?

Po atëherë çdo të thotë ky fanatik i mëndësisë se ‘çmë duhet mua se ç’ka kam shkruar përpara?

Dhe këtë nuk e ka për herë të parë: A nuk qe Zheji që e kritikonte Blushin se po kërkonte qiqra në hell me zgjedhjet në parti se Rama qe fituesi i zgjedhjeve?

Natyrisht kush e njeh mënyrën se si kurdiset dhe nga inspirohet Zheji, e ka të qartë se pse ai po e sulmon Blushin.

Të gjithë e dinë se kur Ilir Meta hodhi idenë e qeverisë teknike, Blushi, një kritik i madh i Ramës, nuk pranoi të bëhej pjesë e tratativave të një plani mes Metës dhe Berishës për të bërë një qeveri të tyre.

Ishte gjëja më e natyrshme më parimore dhe më logjike.

Sepse të kritikosh rilindjen, për korrupsionin, dominimin e njishit, mungesën e zgjedhjeve, makutërinë në pushtet dhe të shkosh e të bësh koalicion me Berishën dhe Metën, është njësoj si të kesh folur kot.

Blushi nuk është i blerë se nuk shkoi të shitej tek Meta si shumë socialist të tjerë.

Por për logjikën e Zhejit, sipas të cilës dikush duhet të të paguajë patjetër, Blushi po ,vërtet është shitur te Rama. Arsyeja e thjeshtë sepse nuk pranoi të bliehej nga Meta”.