Tre zarfat

Tre zarfat – Nga Bilbil Beqiri 

Na ishte dikur një drejtues, (një lider, një politikan) quajeni si të doni, që kishte udhëhequr për një kohë shumë të gjatë, ndoshta 20 apo 30 vjet, dhe kishte vendosur t’ia transferonte pozicionin njeriut të tij të besuar që ishte kuptohet i ri në moshë.

Përpara se t’i linte detyrën djaloshit, që mezi priste ta merrte, vendosi fillimisht të shkruante tre porosi në tre zarfa të ndryshëm në formë testamenti. Pasi mbaroi së shkruari zarfat thirri djaloshin dhe ia zgjati zarfat bashkë me paralajmërimin për të mos i hapur veçse në rast nevoje. Madje ia kujtoi atij se duhej t’i hapte zarfat  një nga një sipas rënditjes së caktuar.

Burri vdiq dhe djaloshi mori drejtimin

Pa kaluar shumë kohe filluan problemet dhe pakënaqësitë po shtoheshin dita ditës. Djaloshi i zënë ngushtë vendosi të hapte zarfin e parë.

Po çfarë shkruante në zarfin e parë?

Në zarfin e parë gjeti të shkruar fjalinë që do ta ndihmonte të kapërcente peripecitë. -‘ Për çdo gjë që shkon keq, fajëso parardhësin’

Djali filloi fushatën e hedhjes së fajit për çdo gjë që shkonte keq, parardhësit të tij. Dhe kjo funksionoi për një kohë goxha të gjatë.

Ndërkohë vitet kalonin dhe efekti i zarfit të parë filloi të zbehej. Përsëri pakënaqësi, përsëri probleme për djaloshin drejtues.

I erdhi në mendje zarfi i dytë. Mori menjëherë zarfin dhe lexoi porosinë  që do ta ndihmonte për më tej. -‘ Premto,  dhe vetëm premto. Premto për çdo gjë’- ishte porosia e zarfit të dytë

Djali u gëzua shumë se në këtë mënyrë do ia zgjaste jetën edhe për ca kohë pushtetit të tij, dhe ashtu ndodhi.

Por koha bëri të veten dhe efektet e premtimeve të bollshme u zbehën. Premtimet nuk po e shpëtonin më karrierën si drejtues, të djalit.

Por atij i kishte mbetur ende edhe një zarf. I lumtur për këtë fakt nxitoi ta hapte edhe zarfin e tretë. Dy zarfat e parë e kishin ndihmuar shumë.  Kishte qeverisur me vite të tëra në sajë të atyre zarfave.

Hapi edhe zarfin e tretë

‘ Bir nëse ke ardhur te zarfi i tretë e ke punën pisk. Bëj gati edhe ti tre zarfa për testamentin tend’ – shkruante burri në zarfin e tretë. Djalit nuk i pëlqeu, ajo çfarë lexoi por megjithatë e kuptoi që edhe atij i kishte ardhur momenti i largimit dhe mori të shkruante edhe ai tre zarfat e tij në respekt të porosisë së mentorit të tij

Po ju, te i sati zarf jeni si drejtues? 🙂

/Podiumi.com