Blendi Fevziu duke iu rikthyer lëvizjes studentore të vitit 1990, sjellë edhe njëherë në vëmendje atë që ndodhi në Shqipëri 26 vjet më parë.

Fevziu shkruan se, PD lindi si reagim i Lëvizjes Studentore Shqiptare të dhjetorit 1990 që i imponoi udhëheqjes komuniste lejimin e pluralizmit politik.

Por, Fevziu tregon se çfarë ndodhi më pas me këta studentë. Disa vendosën të kthehen në auditorët e tyre, të tjerë u larguan nga Shqipëria, siç pati nga ata që u angazhuan në politikë, thotë ai.

“Madje u angazhuan me të gjithë forcat politike, edhe ato që nuk dolën nga lëvizja e Dhjetorit, siç ndodhi me Majkon apo Metën. Pra Lëvizja Studentore synonte lejimin e Lirisë politike dhe individuale, ndërsa PD, administrimin e saj përmes një programi konkurrues”, shkruan ai në “Opinion.al”.

Më pas, Fevziu bën një bilanc të arritjeve dhe dështimeve të PD-së në 13 vite qeverisje të peridhës pluraliste.

“Nëse në 1991 ishte dekomunistizimi, në 1992 ishte rikthimi i ekonomisë së tregut; nëse në 1995 Shqipëria nisi rrugën integruese duke u bërë anëtare e Këshillit të Europës, në 2009 ishte anëtarësimi në NATO; Nëse në 2005 ishte lufta kundër korrupsionit dhe arrestimi i bandave, në 2010 ishte liberalizimi i vizave; nëse në 1994 nisi ndërtimi i kilometrit të parë të autostradës në 2009 u ndërtua një segment i tërë që lidhi Shqipërinë me Kosovën. PD e ka qeverisur vendin në gjysmën e periudhës së tij pluraliste. E ka qeverisur me gjithë sukseset e mësipërme, por dhe dështimet e saj, siç qenë humbja e referendumit në 1994, kufizimi i lirive politike më 1992, zgjedhjet e Majit 1996, piramidat, ngjarjet e pranverës 1997, problemet që solli 21 Janari por edhe një koalicion i dështuar me LSI në mandatin e dytë 2009 – 2013”, shkuan ai.

Kurse për liderin e saj historik, Sali Berisha, Fevziu thotë se është figura kryesore politike në vend ndaj të cilit ka ndjenja ekstreme.

“Njerëz që e duan dhe ekzaltohen prej tij dhe njerëz që e urrejnë. Problemi i Berishës nuk është e shkuara, pra raporti i tij me historinë, por raporti që ai do të ruajë me liderin e PD, Basha, apo kushdo qoftë në vitet që do të vijnë”, përfundon Fevziu.