Tenori Saimir Pirgu

Saimir Pirgu, lindi më 1981 në Elbasan. Nisi shumë i ri studimet në muzikë duke u diplomuar në violinë në qytetin e tij të lindjes, e më pas për kanto në konservatorin “Claudio Monteverdi” të Bolzanos në Itali. E nisi karrierën e tij me Festivalin e Operës Rossini  me “Il viaggio a Reims” dhe “Adina”. Për Saimir Pirgun filloi një bashkëpunim shumë i rëndësishëm me Staatsoper të Vienës (Opera shtetërore), ku midis shumë vënieve në skenë, talenti i tij vlerësohet jashtëzakonisht tek “L’Elisir d’Amour”, për të cilën fiton edhe çmimin e lartë “Eberhard Waechter Gesangsmedaille”, që u jepet të rinjve të karrierës.

Ishte vetëm 22-vjeçar kur këndoi “Così fan tutte” në Ferrara, drejtuar prej Claudio Abbados, në verën e vitit 2004, në Festivalin e Salsburgut nën drejtimin e Philippe Jordan. Duke vazhduar debutime të rëndësishme artisti ri shqiptar këndon në skenat e teatrove më të rëndësishëm të botës, duke nisur nga: Opera Shtetërore e Hamburgut (Hamburgische Staatsoper), në Bayerische Staatsoper të Monacos, Operën Shtetërore të Berlinit (Berliner Staatsopen), Teatrin e Operës së Romës, Akademinë Nacionale Italiane “Santa Cecilia”. Saimir Pirgu bashkëpunon me dirigjentët më të njohur të orkestrave si: Claudio Abbado, Riccardo Muti, Lorin Maazel, Daniele Gatti, Seiji Ozawa,Franz Welser Möst, Gustav Kuhn, Antonio Pappano dhe Nikolaus Harnoncourt.

Në vitin 2006 ka regjistruar për “Universal” albumin e tij të parë “Angelo Casto e Bel”, një antologji me arie operistike nga Mozart, Pergolesi, Bononcini, Donizetti, Verdi dhe Massenet. Pirgu numëron shumë çmime mëse të merituara, duke na bërë krenarë për origjinën e tij shqiptare.