Artan Lame nuk ka harruar të kujtojë ditën kur kreu ndërhyrjen kirurgjikale në zemër, pas një ataku kardiak më 18 mars të vitit 2016. Sot, një vit më pas, ai shkruan se ka qenë një kthim dhe reflekton mbi gjërat që ka bërë dhe ato që nuk i ka bërë dot. “Por zemra e mishtë që përleshej mes bisturish të çelikta, më bën sot t’ju kujtoj të gjithëve se sa i hollë është tehu që ndan atë se ku do jemi, këtej apo andej. Eshtë aq i hollë, sa nuk ja vlen ta mprehim edhe më tej atë me pakujdesitë tona të zhurmës së përditshme”, shkruan Lame në statusin e tij në Facebook.

Ndërhyrja e një viti më parë zgjati plot 12 orë dhe mund të thuhet me plotë gojën se është një jetë e dytë për Artan Lamen. Ai njihet si njeri pasionant, i dhënë pas koleksionit dhe fotografisë, artit dhe letërsisë dhe që në të njëjtën kohë po drejton një prej institucioneve më problematike, atë të kthimit dhe kompesimit të pronave. Dhe ashtu ka qenë edhe statusi i sotëm, i një njeriu që falenderon universin për këtë kthim të dytë dhe që bën thirrje për më shumë mirëkuptim sepse mund të jetë dita e fundit që jetojmë. “E vetmja mënyrë për të marrë diçka më shumë, është të japim. E kam thënë, s’ka rëndësi çfarë: panem, amor, vitam…”, thotë Lame.

Statusi i plotë i Artan Lames:

KTHIM Miq, Sot mbush vitin që prej ditës kur vendosa të qëndroj ende këtu, në këtë pjesëz tokësore të Pafundësisë. Në këto 365 ditë, ende s’i kam dhënë dot përgjigje pyetjes në dukje shumë të thjeshtë: I kujt qe vullneti që të kthehesha sërisht? Ndoshta Universi është organizuar në një të atillë mënyrë, që ca pyetjeve të mos mundemi kurrë t’u japim udhë. Dhe përmes këtij mundimi drejt njohjes, kalon edhe e gjithë përpjekja për të mirën. Shumë nga gjërat që premtova t’i bëj që atëhere, ndoshta nuk i kam bërë, paçka se e kisha shpirtin të zhveshur në eter. Por zemra e mishtë që përleshej mes bisturish të çelikta, më bën sot t’ju kujtoj të gjithëve se sa i hollë është tehu që ndan atë se ku do jemi, këtej apo andej. Eshtë aq i hollë, sa nuk ja vlen ta mprehim edhe më tej atë me pakujdesitë tona të zhurmës së përditshme. I thashë, më tha, s’i flas, do t’i bëj këtë, i keqi, do ta zhduk, ja ngeca, do ta marr, se jap, t’ia marrim, ta prishim, s’dua, se bëj, s’ma bën, e plot e plot të tjera ankthe, me të cepat e theptë të të cilëve gërricim ditët tona. Jua thotë këtë dikush që e pa atë teh, e jo veç e pa, por edhe e ndjeu në mish të vet. Ky vit që shkoi, më ka bindur edhe më tej në dobinë e dhënies. Universi është shumë i pafund për të patur kohë ta marrim të gjithin brenda vetes, edhe në qofshim aq të pangour. Ndaj e vetmja mënyrë për të marrë diçka më shumë, është të japim. E kam thënë, s’ka rëndësi çfarë: panem, amor, vitam… Dhe se fundi, sa herë bëni dicka, bëjeni me shpirt dhe ndjejeni deri në shpirt, sepse c’do herë mund të jetë e fundit. A.