Protagonisti i protestave të shumta, debateve dhe fjalimeve të zjarrta po bëhet çdo herë e më pak i dukshëm për publikun.

Deputeti i Vetëvendosjes ose siç e quante veten në një intervistë ‘aktivisti më i shquar’ i saj, Albin Kurti, prej kohësh ka rralluar daljet, jo vetëm në media, por edhe në publik. Kryetari i dikurshëm i Vetëvendosjes, që krijoi identitetin e tij politik përmes apelimit në populizëm, të fundmen herë është parë të marrë pjesë në një nga mbledhjet e përgjithshme të subjektit të tij, i ulur diku në publik.

Rrallimi i performancës së tij ka ngritur pikëpyetje të njëpasnjëshme. Sado që Kurti ushtron vetëm funksionin e deputetit, roli i tij në Vetëvendosje e eklipson edhe atë të kryetarit, Visar Ymeri.

Karizma e tij dhe aura e një rebeli të pandreqshëm  e  bëjnë të jetë ‘eminenca gri’ e Vetëvendosjes.

Rivaliteti latent me Shpend Ahmetin dhe kontingjentin që solli ai brenda Vetëvendosjes, nuk ka shkaktuar dot plasaritjen e madhe, aq shumë të parashikuar nga analistë e media të ndryshme.

Burime të afërta me Vetëvendosjen kanë thënë për Konica.al se për një kohë Albin Kurti dhe Shpend Ahmeti as nuk kanë folur me njëri-tjetrin. Megjithëse përçarja rri pezull në erë, ajo ende nuk ka shkaktuar ndarjen e Vetëvendosjes dhe largimin e Shpend Ahmetit, Dardan Sejdiut dhe disa të tjerëve që vijnë nga partia e shuar, Fryma e Re (FER). Kalkulimet e dyanshme sikur e kanë fashitur moment tjetër ‘skizmën e madhe’ në Vetëvendosje.

Ndërkohë, Kurti gëzon autoritet të padiskutueshëm moral në radhët e aktivistëve dhe militantëve të Vetëvendosjes. Brenda saj organizohet edhe ‘shkolla politike’, qëllimi i së cilës është ‘formimi ideor i aktivistëve’. Selia e këtij subjekti në lagjen ‘Arbëria’ është hyrje e dalje e qindra të rinjve që marrin pjesë në ligjërata, debate e komentime të filmave ideologjikë.

Fandaksja mbas Kurtit si frymëzim shkon deri atje sa në rrjetet sociale ka edhe faqe të tilla si ‘Thënie nga Albin Kurti’, ‘Kryeministri im është Albin Kurti’, ‘Albin Kurti Lider për Bashkimin e Shqiptarëve’ e të ngjashme.

Rasti tragjik i vdekjes në rrethana të dyshimta të aktivistit Astrit Dehari në Qendrën e Paraburgimit në Prizren, duket se ka ndikuar edhe brenda radhëve të Vetëvendosjes.

Intrasigjenca e dikurshme e Vetëvendosjes që akuzonte pushtetin se ka pasur gisht në vdekjen e Deharit (ose vrasjen e tij, siç mëtonin vitin e kaluar), është zëvendësuar me një heshtje të çuditshme. Ndonëse organet e drejtësisë ende nuk e kanë thënë fjalën e tyre përfundimtare nëse ishte vrasje apo vetëvrasje, Kurti sikur ndien një lloj përgjegjësie të pakapërcyeshme. Ai ishte i pari që e kishte quajtur vdekjen e Deharit si ‘vrasje’, çka solli një pezmatim të përgjithshëm kolektiv në Kosovë.

Zigzaget e procesit hetimor për Astrit Deharin dhe ndërkombëtarizimi i tij e bëri Vetëvendosjen më të matur në deklarimet e saj rreth rastit në fjalë. Në të vërtetë, daljet e rralla të Kurtit mund të kontekstualizohen pikërisht te ky rast: intervista e tij në KTV me 7 nëntor të vitit të kaluar është e vetmja gjatë këtyre muajve.

Pretendimin e njëjtë Kurti, d.m.th. skenarin e vrasjes së Deharit, nuk e ka përsëritur asnjëherë, madje në biseda private edhe figura të tjera të Vetëvendosjes nuk ngulmojnë për ta quajtur rastin si vrasje.

Ndërkohë Vetëvendosja ende nuk e ka kuruar veten nga trashëgimia e vitit të kaluar, plot me konfrontime, gaz lotsjellës e konfliktualitet me Qeverinë. Për një moment ajo u ndodh e vetme, e qarkuar nga një opinion, simpatia e të cilit po shkonte drejt koalicionit qeverisës dhe aleatëve të dikurshëm të saj që e braktisën njëri pas tjetrit (Aleanca për Ardhmërinë e Kosovës dhe Nisma për Kosovën).

Në këtë udhëkryq, Vetëvendosja duket më e pavendosur se kurrë….

/Konica.al