Programi i Bashës vs. sondazhi i Ramës

Nga – Ndue Kalthi

Qytetarët kanë folur, kanë shprehur hallet e shqetësimet me të cilat ndeshen çdo ditë. kanë vënë gishtin në plagë, e kanë treguar atë që u dhëmb më shumë. Vuajtjet e çdo ditë, pamundësinë për të përballuar shpenzimet, për të gjetur një punë, apo për të marrë kujdes mjekësor në mënyrë të denjë. E këtë e thotë kryeministri Rama, në raportin e tij “pas konsultimit” me qytetarët. Një gjë që duhet ta kishte bërë jo vetëm gjatë 4 viteve që pretendoi për më shumë mundësi e zhvillim, por të paktën në 30 ditët e fushatës, ku foli për timon, tepsi, poture, por për bukën e shqiptarëve. E sot ata zbrazën thesin, e ia thanë një për një, atë që në fakt duhet t’i thonin me votë. Iu ankuan për drejtësinë, administratën, arsimin, bujqësinë, e shëndetësinë. E në fakt, sot Rama po përpiqet të hartojë atë që shqiptarët e patën gjatë fushatës të zezë mbi të bardhë, një program ekonomik që kryedemokrati Lulzim Basha ua shpalosi qytetarëve. Një program që synonte më shumë zhvillimin, të ardhura, e mundësi për të gjithë shqiptarët. E sot sërish Basha është me qytetarët për t’i treguar dëshirën e vullnetin për një të nesërme ndryshe, për një të ardhme mundësish, ku secili të mund të ecë sipas meritës, pa u dashur të varet pas mëngës së dikujt. Kjo është alternativa e shpresës, e së ardhmes, e punësimit, dhe e zhvillimit. Dhe qytetarët ditë të prekin ndryshim e një beteje që Basha po përpiqet ta fitojë i vetëm, përpos sulmeve, intrigave, e baltosjeve. Përpjekja që Basha ka nisur për një republikë të re, është padyshim një nevojë emergjente, për të dalë nga situata e vështirë në të cilën ndodhen shqiptarët. E për fatin e keq, të shqiptarëve padyshim, politikanët e djathtë e të majtë, nuk denjuan t’i jepnin një dorë, një mbështetje kësaj “formule” të rëndësishme për të nesërmen. Gjithçka i duhet në këtë rrugë të lidershipit të PD është pak entuziazëm dhe përkrahje, për një republikë të re, për një kontratë të re mes politikanit e qytetarit. Çdo demokrat duhet ta gjejë veten në PD të përfaqësuar, ku zëri i tij dëgjohet, ku mundësia për të rinjtë është “A-ja”, ku inatet e mëritë e vjetra lihen pas, ku integrimi e modeli europian, është një interes që duhet të jetë mbi shumëçka. Sytë e demokratëve tashmë janë te gara për kreun e partisë, pas një humbje jo për faj të Bashës, por të gjithësecilit që nuk denjoi të jepte kontributin e tij, qoftë edhe për një shpresë sa më të vogël për qytetarin e thjeshtë. E aq më keq, pati nga ata, që e tërhoqën pas “rrotën e përparimit”, duke i futur shkopinj në rrota përpjekjes për t’u dhënë shqiptarëve atë që e meritojnë prej vitesh. Por Basha e ka një model, një model që fitoi besimin e demokratëve, të atyre që patën guximin të ecin përtej frikës, përtej bllokimit, e shantazhit. Ai tani ka një garë politike, që do ta fitojë me mbështetjen e çdo demokrati, dhe me angazhimin për një të ardhme më të mirë, me “një timon, jo për vete, por për qytetarin”.