Në politikë asgjë nuk është ashtu siç duket

          Të gjitha partitë politike kanë ekipet e tyre të propagandës. Ajo që bën dallimin është se cila prej tyre ka ekipin më të ftohtë dhe racional e cila kërkon dhe përpunon informacione si sondazhe, studime, etj., e më pas këshillon bazuar mbi ato të dhëna, e cila prej tyre ka ekipin më emocional e impulsiv që i bën më shumë selfie vetes se sa foto titullarit, e i thur lavde kryetarit të partisë se sa i madh ai është, sa thellë do fitojë, dhe i pëshpërit në vesh gjithmonë atë që ai dëshiron të dëgjojë.

          Marrëdhëniet me Publikun, ajo që njihet si Public Relations, ose thjeshtë PR, janë komplekse dhe kërkojnë njerëz me intuitë dhe aftësi të jashtëzakonshme mendimi dhe kreativiteti. Megjithatë, ka një rregull primitiv që mund ta zbatojë kushdo. Ky rregull është: Argëto turmën.

Pëllumbi në supin e Fidelit, Koloseu dhe ndeshjet me gladiatorë, dritat e kuqe në Hollandë, vendosja e festave të reja në kalendar, evente sportive e muzikore, festa birrash dhe qoftesh, një barsoletë live në televizion, një fotografi “pa mendje” apo për të qeshur e një titullari, një letër e një fëmije drejtuar një shtetari etj., nuk janë të rastësishme. ‘Argëto turmën’ funksionon më së miri në çdo rast, çdo ditë dhe çdo epokë për të zhvendosur vëmendjen nga gjërat e rëndësishme.

E kush mund ta dijë këtë më mirë se sa ne që jetojmë në Shqipëri, në këtë vend ku 99% e njerëzve nuk e dinë se sa ka arritur borxhi i jashtëm apo sa është niveli i investimeve të huaja në Shqipëri, dhe vetëm 1% nuk e di se të kujt janë ato atletet e bardha adidas me shirita të kuq. ‘Argëto turmat’. Funksionon në mënyrë të përkryer.

Në politikë asgjë nuk është ashtu siç duket. Ai që deklaron se “Unë nuk do ju tradhëtoj kurrë” është tradhëtari më i madh, dhe ai që deklaron se “Kjo është e vërteta” por ju thotë një gënjeshtër të madhe.

“Sa më e madhe gënjeshtra, aq më shumë besohet ajo” ka thënë Joseph Goebbels, shefi i propagandës së Adolf Hitler dhe regjimit të tij Nazist. Ai gjithashtu tha se “E vërteta është armiku më i madh i shtetit”. Nazizmi dhe Goebbels na lanë shëndenë, por propaganda politike vazhdon edhe sot në forma të reja në këtë periudhë neo-liberale që ka zaptuar botën.

Ka një mënyrë për të shpëtuar nga gënjeshtrat që na serviren çdo ditë, apo ti afrohemi sado pak të vërtetës politike apo retorike. Lexoni Kuintilianin dhe veprën e tij Instituti Oratorisë, ose Aristotelin dhe veprën e tij Retorika, shkrimet e Eduard Bernays, e mjeshtër të tjerë të PR. Por duke e njohur mirë dashurinë e njeriut neo-liberal për rrjetet sociale, e dyshoj që librat e trashë, të vjetër dhe të bezdisshëm do ju marin kohë nga leximi i vyer i statusve në Facebook, aty ku politika jo vetëm nuk është ashtu siç duket por aty ti ndjehesh sikur je vetë Kryeministri apo Presidenti i vendit./Dr. Bledar Kurti