Sot janë emrat më të suksesshëm të ekranit dhe profesionistë në fushën që përfaqësojnë, por shumë prej shqiptarëve të famshëm kanë studiuar për të tjera profesione.

Madje disa prej tyre, si Luana Vjollca apo Adi Krasta, nuk i kanë praktikuar kurrë profesionet për të cilat kanë studiuar.

Fama që iu dha ekrani televiziv apo dhe zhanre të tjera i bënë që të hiqnin dorë nga profesionet e tyre të para.

Me sa duket pasioni i ka mposhtur vitet e studimeve dhe sot i shohim në fusha të tjera, ku duket se kanë gjetur plotësisht veten.

1- Armina Mevlani sot është një blogere dhe sipërmarrëse e njohur, por kujtojmë se ka mbaruar studimet në fakultetin e Shkencave Sociale, dega Filozofi.

2- Kryeministri Edi Rama ka studiuar për pikturë, ndërsa prej vitesh i është futur botës së politikës, megjithëse nuk e lë pas dore as pasionin për pikturën.

3- Luana Vjollca ka studiuar për drejtësi ndërsa sot është një ndër moderatoret më të suksesshme.

4- Sali Berisha është një ndër politikanët më të njohur shqiptar, i cili dikur ka mbaruar studimet në Fakultetin e Mjekësisë dhe është specializuar në kardiologji. Në fillimet e tij të para ka punuar si mjek, por me hyrjen e demokracisë ai u bë kryetari i Partisë Demokratike dhe për vite të tëra ka qeverisur shqiptarët.

5- Adi Krasta sot është një ndër moderatorët më të vlerësuar të ekraneve shqiptare, por dikur nën shtysën e prindërve ka studiuar për Kimi në Fakultetin e Shkencave të Natyrës. Pavarësisht përpjekjeve për të plotësuar dëshirën e prindërve Krasta e kuptoi se ky nuk ishte profesioni i tij dhe kaloi drejt gazetarisë, një profesion në të cilin ka shkëlqyer ndër vite.

6- Elvana Gjata pak ditë më parë zbuloi se ka studiuar për regji megjithëse nuk e ka praktikuar asnjëherë këtë profesion.

7- Soni Malaj është diplomuar për gjuhë të huaja për degën frëngjisht në profilin “Përkthim”, një profesion të cilin nuk e ka praktikuar. Suksesi në muzikë e bëri që të heqë dorë nga profesioni për të cilin ka studiuar.

8- Turjan Hyska ka mbaruar Fakultetin e Shkencave Sociale në degën Shkenca Politike, por prej vitesh i është futur botës së televizionit si gazetar e moderator.