Kryesore
A të qaj 5 minuta?!
Shkruar nga Mond Bruça
A të qaj 5 minuta kur veshtë e mi dëgjojnë fjalët më të ndyra nga politikanët e zgjedhur të vendit tim?!
A të qaj 5 minuta, kur studentët e vendit tim revoltohen për kushtet e tyre mjerane.A të qaj 5 minuta kur rinia zgjohet me dëshirën për t’u larguar nga vendi im?!
A të qaj 5 minuta kur qytetarëve të vendit tim u shkatërrohet prona nga shteti që nuk i kompenson?!
A të qaj 5 minuta kur mediat bëhen të varura nga politika dhe nuk tregojnë të vërtetën e vendit tim?!
A të qaj 5 minuta kur në fshatin tim nuk ka rrugë as ujë?! A të qaj 5 minuta kur një politikan bëhet milioner me preteksin që po i shërben qytetarëve ndërsa një mësues me shumë vështirësi mbyll muajin?!
A të qaj 5 minuta kur në vendin tim futet në punë ai që ka mik, dhe jo ai që e meriton?! A të qaj 5 minuta kur mbi lumenjtë e vendit tim ndërtohen pafund hidrocentrale dhe energjia elektrike është përsëri shumë e shtrenjtë?! A të qaj 5 minuta kur në vendin tim ilaçet shiten të skaduara?! A të qaj 5 minuta kur frutat bio të qytetarit të vendit tim hidhen në plehra sepse importi i atyre me hormone mbyt tregun?!
A të qaj 5 minuta kur policia fshihet anës rrugës për të vënë gjoba shoferëve, ndërsa rrugët e lagjeve të qyteteve vjen era hashash?!
A të qaj 5 minuta kur në spitale nuk të merr askush në dorë nës nuk shpërndan lek?!
A të qaj 5 minuta kur vota e qytetarëve të mi blihet vetëm që të njëjtat fytyra të gëzojnë gjithë jeten në pushtet?!
A të qaj 5 minuta kur arsimi i vendit tim është skandaloz?!
A të qaj 5 minuta kur pyjet e vendit tim shkatërrohen çdo ditë?!
A të qaj 5 minuta për dhimbjen time që e dua Shqipërinë më shumë se veten… ?!
/Podiumi.com
Duhet të jeni i kyçur në mënyrë që të mund të lini një koment Kyçu