A po paralajmëron Duma publikimin e përgjimeve të reja?

Mbrëmjen e së enjtes, ish deputetja e Partisë Demokratike, Grida Duma paralajmëroi publikimin e materialeve që shfaqin zyrtarë të mazhorancës të përfshirë në ngjarje kriminale.

Në një intervistë në Abc News, Duma la të kuptohet se zyrtarët e përfshirë në materialet në fjalë janë funksionarë të lartë të qeverisë, bile nuk përjashtoi as ministrat.

Duma deklaroi: “Unë besoj që pa asnjë diskutim do të ketë dhe duhet të ketë. Është e pamundur që maja e ajsbergut, ajo që dëgjuat ju te Bild-i të mbarojë aty. Pa asnjë diskutim që kjo është çështja. Pa diskutim që kemi dijeni për të tilla fakte. Për funksionarë të lartë. Pse jo edhe ministra. Ka indicie të tilla. Keni për të parë në ditët në vijim se politika është edhe art i parashikimit deri diku, ose së paku i lëvizjes së radhës. Unë besoj se do shikoni që aty ku duket se Edi Rama i bën fli vetë, në fakt është duke fshehur diçka. Ne i parashohim se cilat janë lëvizjet e mazhorancës për të fshehur problematikën që ajo ka me bashkimin e krimit me pushtetin e shqiptarëve”.

Gazeta gjermane Bild ka publikuar përgjime të dosjes 339 dhe 184, në të cilat kanë qenë të përfshirë edhe zyrtarë të lartë të Partisë Socialiste.