Partia “Zgjidhja”: Fonde ka, por ato i vjedh qeveria me klientët e saj

Partia “Zgjidhja”, nëpërmjet një deklarate për shtyp, ka deklaruar se qeveria po mashtron shqiptarët duke thënë se nuk ka fonde për të rritur pagat dhe pensionet, ndërsa po paguhen përditë e më shumë taksa dhe tarifa.

Sipas “Zgjidhjes”,  vetëm për vitin e ardhshëm shqiptarët do të paguajnë nëpërmjet taksave në buxhet mbi 14.6 miliardë lekë (rreth 120 milionë euro) si pagesa për 14 kontratat koncensionare me PPP, që sipas Ministrisë së Financave, është 15.8% më e lartë se pagesat e këtij viti.

Në përfundim të deklaratës, “Zgjidhja” u ka premtuar shqiptarëve se vetëm me të në pushtet taksat e tyre do të shkojnë për zhvillimin e ekonomisë, rritjen e pagave, pensioneve, të ndihmës ekonomike dhe për financimin e sektorëve jetikë shtetërorë.

Deklaratë shtypi e partisë “Zgjidhja”

Fonde ka, por ato i vjedh qeveria me klientët e saj

Qeveria thotë se nuk ka fonde për të rritur pagat, pensionet dhe pagesën për familjet me ndihmë ekonomike, sepse i mungojnë rreth 100 milionë euro të ardhura nga tatimet dhe doganat.
Mashtrim! Shqiptarët paguajnë përditë e më shumë taksa dhe tarifa, por ato vidhen. Fonde ka, por ato do të shkojnë për klientët e qeverisë. Vetëm për vitin e ardhshëm shqiptarët do të paguajnë nëpërmjet taksave në buxhet mbi 14.6 miliardë lekë (rreth 120 milionë euro) si pagesa për 14 kontratat koncensionare me PPP, që sipas Ministrisë së Financave, është 15.8 për qind më e lartë se pagesat e këtij viti. Rruga e Arbrit, sterilizimi i mjeteve kirurgjikale, skanimi i automjeteve në dogana, Rruga e Kombit apo pagesat për inceneratorët e Fierit dhe të Elbasanit, do të gllabërojnë fondet që mund të shkonin për rritjen e ekonomisë, të pagave, pensioneve, ndihmës ekonomike, apo në buxhetin e sektorëve publikë që po falimentohen qëllimisht nga qeveria.
‘Zgjidhja’ është e bindur se me këtë qeveri nuk do të ketë ditë të bardhë për shqiptarët, brenda dhe jashtë kufijve.
‘Zgjidhja’ u ka premtuar shqiptarëve se vetëm me të në pushtet taksat e tyre do të shkojnë për zhvillimin e ekonomisë, rritjen e pagave, pensioneve, të ndihmës ekonomike dhe për financimin e sektorëve jetikë shtetërorë, që çdo shqiptar të jetojë me dinjitet. Çdo qindarkë e paguar prej tyre me anë të taksave do t’u kthehet në mirëqenie, ndërsa klientët e qeverive të Berishës dhe të Ramës do t’i paguajnë një në një këto qindra milionë euro që po përfitojnë padrejtësisht.