Vokshi përshendet vendimin e AMA-s: Projekt-ligji për median antikushtetues
Ish-kryetarja e Komisionit parlamentar të Medias, Albana Vokshi përshëndeti vendimin e bordit të Autoritetit të Medias Audiovizive për të mos miratuar projekt-ligjin për median, propozuar nga qeveria Rama, pjesë e paketës ‘anti-shpifje’.
Me anë të një shkrimi në Facebook, ish-deputetja Vokshi u shpreh:
“Sot, shumica e Bordit të AMAs: Sami Neza, Agron Gjekmarkaj dhe Suela Musta, duke qëndruar në lartësinë e detyrës për të cilën janë votuar, kanë rrëzuar me shumicë votash (3 vota kundër dhe 2 vota pro) ligjin e rikthimit të dënimeve të gazetarëve për agjitacion e propagandë.
[Ata] e kundërshtuan projekt-ligjin si antikushtetues dhe si cënim të lirisë së medias, lirisë së mendimit dhe të drejtës për informim. Ata shprehën shqetësimin për vlerësimin e përmbajtjes editoriale të mediave të shkruara si dhe kontrollin e tyre nga ana e qeverisë duke anashkaluar parimin e vetërregullimit, siç përcaktojnë direktivat e BE.”
Zonja Vokshi theksoi se projekt-ligjet për media, të propozuara nga shumica socialiste synojnë censurimin e medias dhe për këtë, ‘janë antikushtetuese, janë rrezik për lirinë e medias, lirinë e shtypit, të drejtën për informim si dhe cënim i demokracisë.’
AMA voton kundra projektligjit të qeverisë për median
Bordi i Medias Audiovizive votoi kundra projekt ligjit “Për shërbimet e medias në Republikën e Shqipërisë”.
Në mbledhjen e mbajtur sot për dhënien e mendimit mbi projektligjin për median, tre nga pesë anëtarët e bordit, Sami Nezaj, Suela Musta dhe Agron Gjekmarkaj votuan kundra projektligjit.
Sipas njoftimit për media, të tre anëtarëve të bordit të AMA-së shprehen se projektligji për media i propozuar nga qeveria “ndrydh lirinë dhe zhvillimin e medias informative online, si dhe anashkalon parimin e vetrregullimit të përfshirë në direktivat e BE-së”.
“Fatkeqësisht ndryshimet në ligj nuk janë mbështetur mbi këto praktika të vendeve të lira dhe demokratike duke i dhënë AMA-s, një institucioni të pavarur parlamentar ndër të tjera edhe kompetenca për vlerësimin e përmbajtjes editoriale të mediave”, shkruhet në njoftimin për media.