Si sot 7 vite më parë, u nda nga jeta në një aksident tragjik në fshatin Ibë, ish-deputeti i Partisë Demokratike, Sokol Olldashi, teksa po udhëtonte me makinën e tij nga Elbasani drejt Tiranës.

Olldashi një nga figurat më të shquara të PD, humbi jetën më datë 20 nëntor 2013, pas një aksidenti që i ndërpreu jetën dhe karrierën politike.

Ai ka qenë një ndër studentët e ngjarjeve të Dhjetorit ’90 dhe katër herë deputet në Kuvendin e Shqipërisë. Karrierën e tij e nisi si gazetar dhe kreyeredaktor i gazetës “Albania”. Ndërsa më pas, në vitin 2001 zgjidhet për herë të parë deputet në Kuvendin e Shqipërisë për të nisur një cikël të ri në jetën e tij, atë të politikës.

Po fati nuk deshi që jeta e tij politike të ishte e gjatë. Në korrik të vitit 2013, pas humbjes së zgjedhjeve elektorale nga Partia Demokratike dhe dorëheqjes së Sali Berishës nga posti i kryetarit të Partisë, ai kandidon për kryetar partie, përballë Lulzim Bashës, nuk arriti të fitojë.

Në Kuvendin e Shqipërisë, Sokol Olldashi ishte ndër zërat më të zjarrtë të politikës në përballjen me mazhorancën e re të kryeministrit Edi Rama.

20 nëntori i 2013-ës ishte ditë zie jo vetëm për të djathtën, por për të gjithë politikën në tërësi, pasi do t’i mungonte një zë potent i saj.

Jeta dhe karriera
Sokol Olldashi u lind më 17 dhjetor 1972 në Durrës, ishte deputet i Partisë Demokratike në Kuvendin e Shqipërisë dhe Ministër i Punëve Publike dhe Transportit në qeverinë shqiptare nga viti 2009 deri në vitin 2013.

Shkollimin e mesëm e kreu në vendlindje, Durrës, ndërsa studimet e larta për drejtësi i kreu më 1995 dhe në vitin 2004 Kolegjin e Mbrojtjes, pranë Komandës së Doktrinave. Që nga koha e studimeve fillon të punojë si gazetar në Albania, Rilindja Demokratike, Agjencinë Telegrafike Shqiptare dhe bëhet kryeredaktor i televizionit ATN, pastaj zgjidhet në krye të Forumit Rinor të Partisë Demokratike dhe, në vitin 2001, zgjidhet deputet në Parlament.

Në vitin 2005 i ngarkohet detyra e Ministrit të Rendit, të cilën e dorëzoi për t’u kandiduar në postin e kryetarit të Bashkisë Tiranë më 2007. Pas humbjes, nga viti 2007, mbajti postin e Ministrit të Punëve Publike, Transportit dhe Telekomunikacionit në qeverinë e Shqipërisë.

20 nëntori, mbrëmja me shi
Ishte një mbrëmje me furtunë dhe shtrëngata shiu. Sokol Olldashi po kthehej nga Elbasani, por pak km larg Tiranës, do të ndodhte ajo që i shtangu të gjithë. Lagështia në rrugë, mungesa e fushëpamjes për shkak të reshjeve intensive dhe mjegullës bën që automjeti tip “Benz” të dalë nga rruga në kthesë dhe të përfundojë disa metra në rrëpirë, pranë fshatit Ibë. Ish-deputeti dhe ish-ministri gjeti vdekjen e menjëhershme. Ndërsa lajmi i zi u përhap menjëherë duke tronditur familjen e tij dhe lënë pa fjalë miqtë, të afërmit dhe bashkëpunëtorët.