I ftuar në RTV Ora, deputeti Myslim Murrizi u shpreh se në zgjedhje ka pasur blerje të votave që kanë nisur nga 50-300 euro me para publike.

Murrizi tha se SPAK-u nuk po bën asgjë konkrete nga denoncimet që po bëhen deri më tani dhe se blerja e votës ndodh jashtë kutie.

Murrizi: Po edhe shqiptarët që e kanë shitur votën e kanë shitur nga 300 euro deri në 50 euro. Këto zgjedhje janë blerë me paratë publike. Brenda fushatës ka pasur tendera publikë, gjë që ka qenë e ndaluar. Të gjithë këto janë para votash. Këtu futet edhe paraja e botës së krimit që i jargaviten atij që është në pushtet ose atij që ka më shumë mundësi për të ardhur në pushtet. Këtu është shitur vota për 1.5 euro në muaj, ose një brisk rrojë dhe kjo është mëkat. 50 euro një votë dhe 4 vite që do të durosh një pushtet mbi kurriz, i bie 1.5 euro në muaj, nuk e di çfarë kanë shitur.

SPAK-u nuk po bën asgjë konkrete në dijeninë time nga denoncimet që po bëhen deri më tani. Blerja e votës ndodh jashtë kutie dhe SPAK duhet të ketë tabulatet e telefonave ose metodat e tjera. SPAK nuk ka ardhur nga qielli, por janë po këta prokurorë, vetëm se nuk kanë pasur mbështetje dhe tani janë shkëputur nga politika, janë të pavarur. Unë vetë kam marrë pamjet nga KQZ dhe shpresojmë që të dalë diçka nga ajo që ne dyshojmë.

Murrizi shtoi se kemi një numër shumë të lartë të votave të pavlefshme, gjë e cila nuk ka ndodhur kurrë më parë në 30 vite, që sipas tij konvertohen në rreth 9 mandate.

Murrizi: Ne kemi një numër shumë të lartë të votave të pavlefshme, gjë e cila nuk ka ndodhur kurrë më parë në 30 vite. Kaq shumë vota, do të thotë rreth 9 mandate. Prandaj ne kemi arsye që të dyshojmë. Unë jam krenar që nuk do të jem në këtë parlamentin e ri, me ato figurat e reja intelektuale. Sërish ke plot në Kuvend njerëz që e nisin emrin me shkronjë të vogël dhe e përfundojnë me të madhe. Ka edhe nga ata që paraqesin në CV patentën e trilerit. Këta do të jenë gjithmonë në Kuvend. Partitë që dorovitën mirë morën mandate. Ky do të jetë parlamenti i KÇK-së.