Abdulrazak Gurnah ka fituar Çmimin Nobel në letërsi për vitin 2021, njoftoi të enjten Akademia Suedeze. Çmimi iu dha shkrimtarit me motivacionin “për depërtimin e pakompromis dhe të dhembshur tek efektet e kolonializmit dhe fatin e refugjatit në humnerën mes kulturave dhe kontinenteve”.

Autori Tanzanian 73-vjeç, jeton në Mbretërinë e Bashkuar. Gjuha e tij e parë është suahilishtja, por anglishtja u bë gjuha e tij letrare. Ai është personi i parë nga Tanzania që fiton një Çmim Nobel.

Romanet e famshme të gjuhës angleze të Gurnah përfshijnë “By the Sea”, “Desertion” dhe “Paradise”, e cila u përzgjodh për Çmimin Booker dhe Çmimin Whitbread.

Gjyqtarët vunë re se “historitë e tij shënohen nga prania e Kuranit ose “Netëve Arabe”, dhe anglishtja e tij është e arnuar me gjurmë të suahilishtes, arabishtes, hindishtes dhe gjermanishtes.”

Ai është autor i 10 romaneve, më i fundit “Afterlives” (2020).

Në një deklaratë, Akademia tha, “Përkushtimi i Gurnah ndaj së vërtetës dhe neveria e tij ndaj thjeshtësimit janë goditëse. Romanet e tij tërhiqen nga përshkrimet stereotipike dhe na hapin shikimin drejt një Afrike Lindore të larmishme kulturore, e panjohur për shumë në pjesë të tjera të botës. ”

Vepra e shkruar nga Gurnah, “Parajsa”, ishte ajo që e bëri të famshëm shkrimtarin në skenën botërore. Ajo u shkrua prej tij pas një udhëtimi në Afrikën Lindore rreth vitit 1990 dhe tregon një histori të trishtë dashurie ku përplasen dy botë të ndryshme dhe dy sisteme besimi.