HABERET E BLLOKUT/ Rushaj, njeriu i përputhjes Basha-Rama

Arben Rrozhani

Alfred Rushaj u bë protagonist në fundjavë pasi iu zbulua një sms drejtuar deputetëve të PD-së që të votonin pro dhe më pas të abstenonin për eurobondin 700 milionë euro që do të marrë qeveria për të larë borxhin publik dhe për ca punë të tjera të qeverisë.

Mesazhi ishte një orientim politik që kryetarët e grupeve kanë bërë historikisht me deputetët, por kjo e bërë nga kreu i grupit të PD-së u cilësua dyfytyrësia e PD-së, e cila, nga njëra anë sulmon qeverinë dhe dënon borxhet, nga ana tjetër i miraton (duke abstenuar), duke mos patur guximin politik t’i votojë kundër.

Lulzim Basha nuk i ka fshehur ambiciet për të bashkëpunuar ngushtë me Edi Ramën. Jo vetëm për Reformën Zgjedhore apo atë Territoriale, por edhe në ndarjen e pushteteve në instucionet e pavarura.

Alfred Rushaj është njeriu përfekt që i duhet Bashës për t’u përputhur me Ramën, në rrafshin politik dhe institucional. 48-vjeçari prej vitit 1997 është rehatuar në qeverisjet e majta dhe të djathta, duke qenë në role hije, por që kanë patur shumë peshë në “nëntokën” e qeverisjes.

Nga viti  1997 deri 2005, kur u rikthye Berisha në pushtet, Rushaj mbajti disa pozita  menaxheriale dhe ekzekutive në Korporatën Elektroenergjetike Shqiptare (KESH), apo Kryetari i Bordit Mbikëqyrës të OSSH-së, Anëtar i Bordit të Drejtorëve të OST, Anëtar i Bordit të Drejtues për Agjencinë e Burimeve Natyrore (AKBN).

Ishte koha e artë kur KESH po bënte tendera të blerjes së energjisë ku luheshin qindra milionë dollarë dhe ku akuzoheshin zyrtarët nga kryeministri deri te zyrtarët e energjetikës se kishin përfituar fonde të shumta publike.

Rushaj ishte në këtë rreth zyrtarësh kur më 16 shkurt 2002, policia e kryeqytetit, pas kërkesës së prokurorisë, arrestoi ish-drejtorin e përgjithshëm të Korporatës Energjitike Shqiptare (KESH), Arben Kruja. Duke përfituar nga kriza e rëndë e energjisë këto vitet 2000-2002, KESH, kishte menaxhuar qindra milionë dollarë për blerjen e energjisë, duke paguar çmime më të larta së vendet e tjera fqinje për të njëjtën sasi energjie dhe se blerjet u realizuan drejtpërdrejt dhe pa garë publike.

Këto akuza kishin nisur politikisht në mbledhjet e Komitetit të Përgjithshëm Drejtues (KPD) të PS-së nga Nano për Metën, që në vitin 2000, por Rushaj i mbijetoi kësaj furtune në biznesin qeveritar që prodhoi “lojtarë bursash” si Andis Harasani (ish-drejtor i KESH-it) dhe fonde të shumta që do të mbështesnin krijim e partive të reja si LSI-ja, në vitin 2004.

Rushaj, madje u përfshi në qeverisjen e Berishës si zëvendësministër i Financave në vitet 2009-2013 dhe me të lidhet edhe një skandal emërimi, a i Valdrin Pjetrit, kandidatit të Ramës për Shkodrën në zgjedhjet e 30 qershorit 2019, por që u tërhoq pasi iu zbulua e shkuara e errët në Itali. Ai ishte emëruar në postin e drejtorit të aseteve të antimafias, në kohën e qeverisjes së Berishës, falë ndërhyrjes së Rushajt, mik me babain e Vladrinit, Luigj Pjetrin, ish-nëndrejtor jetëgjatë në KESH. Por edhe pse kjo u bë publike dhe PD ka bërë padi për 30 qershorin, Basha e futi Rushajn në listen e sigurtë të PD-së për 25 prillin, duke e bërë deputet dhe prej shtatorit edhe kryetar të grupit parlamentar, si njeriu që përshtatet dhe përputh kaq mirë qeverisjet PS-PD dhe pse jo edhe Ramën me Bashën./Shekulli.com.al